ORANJESTAD – Cu gran satisfaccion Prome Minister Mike Eman a hiba palabra diaranson atardi na e ceremonia di desvelo di borchi pa construccion di e brug nobo riba Spaans Lagoen. E motibo di e satisfaccion ta cu e trabou aki ta forma parti di e proyecto grandi di Green Corridor cu ta bay conoce un fase nobo di avance.

Mas importante ainda, e brug ta bay percura pa un miho fluho di trafico entre Playa y San Nicolas y vice versa, lagando e brug anterior como un espacio pa core bicicleta y otro movecion fisico, ademas di recreacion pa habitantenan di Balashi, Pos Chikito y bisindario.

E mandatario a cuminsa na reconoce e magnitud di e evento bisando cu “ta un dia sumamente importante pa nos pais y sigur pa e barionan di Pos Chikito , Savaneta, Brasil, San Nicolas, Rooi Master Zeewijk y tur e barionan caminda unda tin un cantidad di ciudadano cu tur dia mester haci uzo di caretera di Playa pa San Nicolas y San Nicolas pa Playa y ta pasa den oranan di mainta y oranan di atardi den un caminda basta congestiona.”

Premier Eman a indica cu su Gobierno a pone como meta no solamente pa alivia e necesidad pa mas vialidad creando un caminda di cuater via cu ta facilita e trafico, pero tambe mehora e calidad di bida di tur esnan cu ta biba cerca di e caminda den otro aspectonan.

A duna e tarea na arkitecto y ingenieronan pa crea areanan berde cu hopi mata y espacio pa pasatempo social. Di e manera ey, e proyecto aki ta mehora e espacio entre caminda grandi y e casnan na ambos banda cu sigur ta un contribucion hopi grandi pa e calidad di bida di e ciudadano cu ta biba di Pos Chikito te cu San Nicolas.

Trabounan di construccion di e brug, como tambe resto di Green Corridor ta bay tuma rond di dos aña. Prome Minister a gradici tur esnan envolvi den e proyecto pa nan aporte valioso, a desea exito na Grupo Odinsa cu su ehecucion y a felicita pueblo di Aruba cu e progreso aki.

Expresionnan haci den e articulo aki no necesariamente ta refleha opinion di ArenaPoliti.co