Prome Minister Mike Eman na inauguracion di trabounan di Brug Nobo na Spaans Lagoen 

ORANJESTAD – Proyectonan grandi na Aruba normalmente ta conta cu sosten y aporte di varios departamento publico, instancianan y companianan local. Un proyecto di e magnitud di Green Corridor ta mucho mas intensivo y compleho y ta rekeri cooperacion y sosten tin mucho mas hende y instancia. Prome Minister Mike Eman a reconoce e trabou di tur esnan envolvi durante su discurso diaranson atardi na inaugracion di trabounan di e brug nobo na Spaan Lagoen.

“Awe nos no ta para aki nos so como gobernante y esnan cu ta eherce e proyecto,” Premier Eman a expresa. “Henter un ekipo a yuda desaroya e proyecto den reunionnan largo semanal, pa lunanan largo, añanan largo.” Leynan mester a wordo pasa pa e proyecto aki por a bira realisabel y awe nos ta para na un punto importante di dje, pa cual e mandatario a gradici miembronan di Parlamento cu tabata presente na e ceremonia.

Minister President a gradici Grupo Odinsa como esun encarga cu e proyecto cu ta e prome PPP grandi haci na Aruba, y como tal, tabata un tereno nobo pa Aruba den sentido legal, administrativo y tambe logistico. “Danki na e directiva y inversionistanan di Odinsa pa e interes y confianza pa realisa un trabou di tal magnitud. E ta un di e proyectonan mas grandi cu nos ta realisando na Aruba y e hecho cu Odinsa ta hacie hunto cu Aruba ta motibo de gran orguyo para nos,” asina Premier Eman a comenta.

Hunto cu e consorcio internacional, Prome Minister a gradici tambe institutonan financiero cu a percura pa aspecto aki di e proyecto. Premier Eman a menciona Deutsche Bank, Aruba Investment Bank, PriceWaterhouseCoopers, como tambe abogado Arubiano Sjiem Fat.

Minister di Infrastructura Benny Sevinger ta e colega den Gabinete Mike Eman II cu ta carga e responsabilidad principal pa e proyecto di Green Corridor, ademas di Hospital, Watty Vos Boulevard y Waf nobo di carga na Barcadera. Prome Minister Eman a splica na esnan presente cu Minister Sevinger a dedica dia y anochi pa haci e proyecto aki posibel hunto cu henter InfraTeam y asesornan, pa keda el a pidi un fuerte aplauso como un motor grandi tras di e desaroyo di Aruba.

Segun e mandatario a indica “Green Corridor ta un proyecto importante cu ta crea trabou, ta crea un infrastructura di calidad y ta crea e perspectiva tambe di un desaroyo nobo pa San Nicolas y bisindario cu un infrastructura na un nivel sumamente halto.”

Prome Minister Eman no kier a laga afo e companianan local di utilidad, esta WEB, Elmar y Setar ya cu nan ta carga un responsabilidad grandi tambe. Tin retonan importante den sentido cu mester percura pa adapta y ahusta e sistemanan di suministro di awa, coriente y comunicacion na e specificacionnan di e proyecto di Green Corridor, causando e menor molester posibel na comunidad.

Den e coordinacion di tur esfuersonan, tin un personal cu ta hunga un papel cardinal y esey ta director di Departamento di Obranan Publico, ing. Marlon Croes. Prome Minister Eman a gradici e y su ekipo, mencionando tambe e cooperacion valioso ricibi for di departamento homonimo Hulandes, esta Rijkswaterstaat.

Por ultimo, Minister President Mike Eman a expresa su palabra di felicitacion na tur cu a comparti e momento importante di alegria aki. “Ban sigui traha pa e proyecto aki por wordo realisa mas pronto cu ta posibel.”

Expresionnan haci den e articulo aki no necesariamente ta refleha opinion di ArenaPoliti.co