Cualkier pais na mundo cu kier sigura un desaroyo economico y social cu ta yega na tur hende den futuro, mester tin e cambio di energia cu ta bin di petroleo pa energia di solo, biento y lama, halto riba su agenda. Niun pais por permiti su mes di ignora e importancia di sigura energia pagabel y duradero pa su pueblo y su economia. Ta pesey paisnan rond di mundo ta inverti den panelnan di solo, pesey nan ta genera energia for di coriente di awa di lama y awa frieu for di profundidad di lama; ta pesey paisnan rond di mundo ta inverti den mulinanan di biento den lama y riba tera. Niun pais por of kier depende di energia cu ta wordo genera di petroleo so, pasobra nan tur sa cu e ta bay caba tarde o tempran y e prijs ta bay sigui fluctua. Sea door di demanda y oferta of door di speculacion cu prijs of pa motibo politico. Niun pais kier sigui depende di otronan pa energia. Aruba tampoco!

INDEPENDENCIA
E palabra independencia a haya un nificacion aserca. E no ta nifica solamente independencia politico como pais pa hiba bo propio maneho interno. E ta nifica tambe e echo cu como pais bo no ta depende di otronan pa e prijs cu bo tin cu paga pa bo energia. E independencia aki kier men cu no ta otro paisnan ta determina cuanto placa bo tin cu paga pa bo companianan y industria por opera of pa regla e temperatur den bo scol y bo casnan, of pa bo tin coriente pa lus, pa cushina. E ta nifica cu bo no ta depende di otro compania of pais pa e nivel di desaroyo Pasobra tur desaroyo ta depende di energia. Asina importante energia ta den nos bida. Sea pa core auto of cushina. Sea pa pone machinann di un compania traha of pa fria cambernan di un hotel. Mas nos tin cu paga pa energia di otro, ta menos nos ta resta pa otro asuntonan importante. Mas cu nos tin cu paga pa energia, ta mas caro tur producto y servicio ta bira.

E desicion di prepara nos pais pa kita e dependencia di energia cu ta bin di petroleo y move mas den direccion di energia di solo, biento y awa cu nos tin na abundancia, ta un di e desicionnan mas importante di gobierno di AVP. E a un escohencia sumamente sabi, responsabel y bon pa generacionnan den futuro. Ken cu haya cu nos na Aruba ta exajera cu e enfasis riba "Green, Green, Green", ta ignora e importancia di prepara nos pais di awor caba, pa sigura futuro generacionnan di Arubianonan, un calidad di bida miho y uno cu no ta depende di otronan. Mientrastanto e mes un maneho di energia "berde" cu no ta caba, por stabilisa e prijs di coriente awor caba. Acaso esey no ta importante awor aki?

ADMIRACION Y DESAPUNTO
Mientras nos pais Aruba (= no e gobierno so!) ta haya admiracion rond di mundo pa a scohe pa tuma iniciativa y wak con pa sigura generacionnan di Aruba den futuro un miho calidad di bida, aki na Aruba y den exterior hende ta keda desapunto cu partidonan politico di oposicion ta asina contra di stimula "energia berde". E falta di argumento di partidonan di oposicion contra di energia berde cu lo haci nos independiente pa energia, tin hende aki y den exterior babuca.

Expresionnan haci den e articulo aki no necesariamente ta refleha opinion di ArenaPoliti.co