E cantidad di placa cu turistanan crucero ta gasta na nos isla a aumenta cu un 17.5%.  E estudio di BREA (Business Research and Economic Advisors) di 2015 ta mustra cu esaki ta e caso compara cu 2012.
BREA ta un instituto internacional reconoci y ta realiza e estudionan aki cada 3 aña y siman pasa nan a presenta nan cifranan oficial pa e aña aki cu ta mustra cu e bishitantenan crucero na Aruba ta gastando 17.5% mas cu na 2012.
E incremento substancial aki ta sumamente positivo y ta mustra cu nos isla ta bayendo riba e bon caminda y por sigui mehora e impacto economico di industria crucero na Aruba.
Minister Otmar Oduber a indica cu e ta sumamente contento cu e resultadonan aki y a manda un felicitacion pa tur esnan cu ta traha den e industria crucero aki y a indica cu esaki ta e logro di un trabou conhunto cu e diferente partnernan tanto den sector priva como gubernamental.
E resultado aki a wordo anuncia siman pasa durante e simposio di turismo crucero durante cual e orador invita Federico Gonzales-Denton, ehecutivo di Royal Caribbean Cruises tabatin solamente palabranan di elogio pa Aruba. El a bisa cu Aruba ta compronde e industria crucero, cu nos isla a mustra nos compromiso y esey ta duna e confianza cu e disposicion tey pa e industria sigui crece.
E mandatario a indica orguyosamente cu un compania asina grandi y prestigioso ta gaba trabounan di nos hendenan y esaki ta un estimulo grandi, hunto cu e resultadonan di BREA pa sigui hiba nos isla dilanti continuando riba e caminda di haci di dje un di e marcanan mas reconoci y respeta na nivel mundial.
2016 ta un muestra di e bon caminda cu ta bayendo cu nos industria crucero, e aña aki, despues di a kibra record na 2013, lo surpasa e cantidad di bishitantenan crucero. 2016 lo wordo conoci como e aña durante cual Aruba a surpasa e 700 mil bishitante crucero, un exito grandi pa henter Aruba.

Expresionnan haci den e articulo aki no necesariamente ta refleha opinion di ArenaPoliti.co