Den e seis añanan cu gobierno di AVP a sinta, tabata tin hopi cambio manera AVP a priminti di haci. Cambionan den economia: economia a crece di -15% pa + 2 %. Un total di 17% den apenas 6 aña. Desempleo a baha di 11% pa 7.5% y tin cu sigui baha. Riba tereno di energia a haci e cambio grandi di dependencia completo di petroleo, pa mas independencia di energia den futuro usando e fuentenan di energia cu no ta caba. Centronan di ciudad, scolnan y barionan tur rond di Aruba cu tabata abandona y a bira areanan liber pa adictonan di droga y criminalnan, a wordo converti den lugarnan agradabel pa nos muchanan, nos hendenan y pa turistanan. Turistanan cu apenas algun aña pasa tabata bin Aruba, pero no tabata sali di e area di Palm Beach, awor ta keiro rond di nos isla y ta gaba e cambionan positivo di Aruba. E forsa di compra di majoria di pueblo cu a bay atras cu mas cu 24% den ocho aña di gobernacion di MEP, a wak nan forsa di compra mehora considerabelmente. E mas cu 20 mil pensionado cu apenas seis aña pasa tabata core e peliger di keda sin niun entrada, a wak con gobierno di AVP a salba nan pensioen y nan entada pa hopi aña mas. Asina tin hopi cambio mas cu a tuma luga den e ultimo seis aña. Tur na beneficio di nos pais y pueblo. Tur sin excepcion!

OPOSICION
Den e mes un periodo aki oposicion politico di Aruba, no a presenta un plan, un idea of un proposicion pa mehora algo den nos pais of pa haci algo miho cu gobierno di AVP ta haci. Oposicion a caracterisa nan mes como CONTRA TUR COS!
Nan a vota contra re-apertura di e refineria y contra di e seguro di pensioen pa e 50 mil trahadornan den sector priva. Nan tabata y ta contra di haci nos pais menos dependiente di energia di petroleo y contra cambio di leynan laboral na fabor di trahadornan, manera esnan den casino y cu ta traha via uitzendburo's. Nan ta contra pa kita beneficionan secundario di minister y parlamentarionan y cotra di renobacion di hospital pa por duna mas y miho servicio pa cuido di salud di henter pueblo. Oposicion tabata contra pa inverti den renobacion di waf, di e caminda di San Nicolas pa Playa y contra di mehoracion di forsa di compra di trahadornan y nan famia, aunke nan mes tambe a probecha di esaki. Oposicion tabata contra di DIALOGO entre gobierno y gremionan y nan ta contra di restructuracion di nos sistema di belasting. Hasta ora ta bon pa Aruba, oposicion ta CONTRA pasobra nan ta haci solamente loke ta cumbini nan politicamente.

Loke si oposicion a haci na Aruba ta di yena corant, radio, television y Facebook tur dia cu un sin fin di storia completamente incorecto. Nan a gaña y troce tur cos pa e parse malo. Tur cos cu bay malo na Aruba y den mundo ta culpa di gobierno. Nan a cambia nan custumber di persecucion politico den gobierno, pa menasa y intimida hende cu no ta di acuerdo cu nan. Recientemente preubanan di esaki a sali den prensa. E final di tur e protesta descabeya, menasanan, gañamento y trocemento di berdad ta cu MEP a logra daña e ambiente na Aruba pa nos propio hendenan y pa inversionistanan di afo. Esey ta e logro di MEP. No un contribucion pa mehora algo den nos pais. Pero si pa crea un ambiente di miedo, di inseguridad y instabilidad na Aruba. Tristo cu nan ta haci esaki mientras PUEBLO ta paga nan pa traha pa Aruba. En dicho "di mentenan negativo no por sali nada bon" tin berdad! Tanten cu oposicion no cambia, no por spera nada positivo pa Aruba di nan.

Expresionnan haci den e articulo aki no necesariamente ta refleha opinion di ArenaPoliti.co