Cooperacion y strategia riba turismo crucero

Siman pasa Minister Otmar Oduber a reuni cu Presidente di Panama Juan Carlos Varela den un bilateral cu a tuma lugar na Miami. Minister Oduber tabata acompaña pa CEO di ATA, Ronella Tjin Asjoe-Croes y Director di APA, Jossy Figaroa. E topico principal di e reunion entre e dos paisnan tabata e cooperacion y strategia riba tereno di turismo crucero conhunto.
E topico aki a wordo inicia anteriormente dor di Prome Minister Mike Eman cu a reuni cu Presidente di Panama pa mira e posibilidad di cera un acuerdo cu industria crucero pa crea rutanan cu ta combini tanto Aruba y Panama. Punto di salida ta cu si traha den un forma uni por presenta un proposicion conhunto y asina por capta mas atencion di e companianan crucero pa nos region.
Desde 2012 Aruba a busca na un forma mas agresivo atrae e lineanan crucero den e temporada abou, pero tambe atrae mas volumen pa crucero, e expansion y e duracion di e barconan na waf y un colaboracion mas estrecho cu e destinacionnan den e parti zuid di Caribe. Den e cuadro aki Aruba a firma un MOU cu e ‘Camara de Turismo de Panama’ y Premier Eman a reitera e compromiso di Aruba cu Panama y turismo crucero, durante su participacion den e “Summit of the Americas” na Panama.
Minister Oduber ta indica cu e alianza cu Panama ta hopi importante, mirando e desaroyonan cu ta tumando lugar eynan y e posibilidadnan grandi cu tin pa e industria crucero na e parti zuid di Caribe dor di conta cu alianzanan strategico y presentando un posicion uni hunto cu e diferente paisnan den e region aki.
E reunion a bay den hopi bon ambiente y a keda di sigui fortalece e cooperacion entre Panama y Aruba.

Expresionnan haci den e articulo aki no necesariamente ta refleha opinion di ArenaPoliti.co