Servicio di 5 strea pa pueblo di Noord!

ORANJESTAD – E prome di cinco Edificionan Multi-funcional planea pa Aruba a keda cla Juni ultimo. Despues di esey a traha duro pa prepara acomodacion pa entre otro Hulpbestuurskantoor (HBK). Durante e periodo ey a habri nan porta tambe oficina di AZV, MedLab, Calloway, Psycoach y na cuminsamento di 2016, Servicio di Impuesto ta habri un oficina den MFA Noord.

Un di e instancianan mas importante den MFA ta Hulpbestuurskantoor di Noord. HBK-Noord tabata ubica den un edificio, cu pa hopi aña, no tabata adecua pa procesa e cantidad creciente di servicionan cu nan por ofrece y clientenan cu tabata tin mester di nan servicio. Pa haci e situacion mas serio ainda, e edificio bieu di HBK no tabata esun di mas apto pa ricibi clientenan. Juli ultimo, mas o menos un luna despues cu a caba cu construccion di e MFA, HBK-Noord a muda y despues di algun dia a cuminsa ofrece su servicionan den e MFA. For di e tempo ey caba por tende di clientenan satisfecho di e servicio di 5 strea cu awor pueblo di Noord ta dispone di dje.

Como cu un gran parti di nan aseguradonan ta di Noord y becindario, AZV a disidi di habri un filial den MFA Noord, pa asina e servicio ta mucho mas cerca y ta hopi mas eficiente pa e cliente cu ta biba na Noord y bicindario. MFA Noord ta e prome MFA cu a keda traha, pero tambe uno cu ta hopi peculiar den e hecho cu tin un acuerdo di cooperacion estrecho cu Centro di Bario Noord, pa entre otro hunto traha na beneficio di Noord y besindario.

MFA-Noord ta e prome edificio publico cu ta 100% sostenibel den e sentido cu tin suficiente solar panel instala eynan, un total di 330 cu ta genera mas energia di loke e edificio mester. E edificio Multi-Funcional ta rekeri aproximadamente 90 KW, mientras cu e panelnan solar ta genera 100 KW. Esaki ta haci e edificio uno historico, pero tambe unico na Aruba.

Diahuebs awo, MFA-Noord ta keda inaugura oficialmente y na e mesun momento ta cuminsa un era nobo pa Noord, pero tambe pa henter Aruba. MFA-Noord ta e prome di cinco MFA cu ta keda construi na Aruba. Na e momentonan aki MFA Paradera ta den fase di construccion basta avansa y MFA-Savaneta ta den proceso di desataho publico. E proceso pa MFA-Sta. Cruz y San Nicolas tambe ta basta avansa.

Expresionnan haci den e articulo aki no necesariamente ta refleha opinion di ArenaPoliti.co