ORANJESTAD/PARIS - Minister di Infrastructura Benny Sevinger a reemplaza Prome Minister Eman na e conferencia COP21 na Paris dialuna. Prome Minister Eman, kende a keda Aruba pa a yuda coordina e trabou di buskeda di esnan cu tabata perdi riba lama, ta biahando dialuna atardi pa Paris pa sigui atende e reunionnan eynan y na Hulanda. Tambe Eman lo hiba palabra den otro encuentronan, lo fungi como panelista y dirigi y papia den algun bilateral. Esaki riba peticion di Reino Hulandes cu tin masha respet y admiracion pa e vision y meta ambicioso di Aruba pa na 2020 ta 100% renobabel. E meta tey, pero tambe tin muestranan palpabel con ta trahando pa logra e meta aki.

Minister Sevinger a percura pa un discurso cortico pero elocuente. El a bisa di ta contento pa den nomber di comunidad di Aruba y Prome Minister Eman, ta parti di e conferencia y firma un declaracion pa proteccion di e oceanoan, algo cu ta regarda mundo henter. “Door di e oceano nos na Aruba ta existi. Un isla chikito unda ta biba alrededor di 110 mil hende, pero cu un cantidad di 1.8 miyon bishitante a base anual. E lama cu ta rondona nos ta e percura pa e ingreso mas grandi cu nos tin. 100% di e awa cu nos ta bebe ta bin di lama. E salo ta wordo saca di dje y nos ta beb’e. Esaki nos ta haciendo pa hopi aña caba y cu orguyo mi por bisa cu e ta un di e miho awanan potabel na mundo. E awa cu nos no ta uza ta bay bek lama, despues cu el a wordo trata.” Sevinger a splica e audiencia cu Aruba ta trahando pa ‘construi’ rifnan di coral nobo. Mescos tambe Aruba ta den proceso pa bin cu e prome parke oceano den Caribe y actualmente Aruba ta tratando e matanan di mangrove na e costa di Aruba ya cu gran parti di nan ta den hopi mal estado. “Aruba ta haciendo su best como un isla chikito pa proteha e oceano cu ta parti di nos existencia. E industria turistico ta depende grandemente riba nos lama. “Nos beachnan ta blou, bunita y limpi.” Prome di a firma e declaracion riba proteccion di e oceanonan rond mundo, Sevinger a bisa cu si Aruba por percura bon pa su lama, tur otro pais na mundo mester por haci mescos. “Laga nos tur aki hunto haci e compromiso pa cuida nos oceanonan pa nan ta saludabel. Danki y ban traha hunto, asina nos ta logra mas. Ban mantene nos oceanonan limpi”, Sevinger a bisa na final.

Expresionnan haci den e articulo aki no necesariamente ta refleha opinion di ArenaPoliti.co