ORANJESTAD – Representando Reino Hulandes Minister Benny Sevinger a papia den un reunion organisa pa SIDS (Small Island Developing States) di Nacionnan Uni diamars, den oranan di mainta den un hotel na Paris durante e cumbre COP21. Un reunion na unda representantenan di SIDS tabata presente – entro nan Minister Camelia-Romer y delegacion di Corsou. Eynan a tene discursonan riba e menasanan cu SIDS ta confrontando y con anda cu nan den e miho forma posibel. COP21 ta e plataforma internacional y mas importante unda cambio di clima y su aspectonan negativo ta wordo trata y con pone un paro na e forma acelera cu e ta bayendo. Despues di dos siman di COP21, e paisnan participante ta firma un acuerdo cu ta defini e agenda pa e e proximo añanan. Pa SIDS e reunion aki ta esencial, ya cu nan ta esnan cu mas ta sufri di e menasa di cambio di clima, sin ta su causante.

Minister Sevinger a papia di Aruba, di su posicion den Reino y mundo y evidentemente su vision 2020. Tambe di e retonan cu Aruba ta haya su mes confronta cu nan. El a splica di e Center of Exellence cu UNDP ta establece na Aruba pa comparti conocimento cu otro SIDS. Na final di su discurso Sevinger a bisa cu ta necesario cu Aruba y tur otro SIDS mester traha hunto pa enfrenta e retonan climatico. “Nos di Aruba y Reino Hulandes ta kere cu solamente trahando hunto, por trece cambionan. Literalmente nos por mira cu e islanan chikito por haci cambio den nan pais y tambe den paisnan grandi.” Despues Sevinger a desea tur presente, den nomber di Aruba y Reino Hulandes un conferencia fructifero y cu tur hende por sigui traha hunto pa un miho bienestar di e comunidadnan.

Expresionnan haci den e articulo aki no necesariamente ta refleha opinion di ArenaPoliti.co