Diaranson siman pasa oposicion (MEP/PDR) tabata tin puro elogio pa e trabou di Raad van Advies. Segun oposicion e analisis y consehonan di Raad van Advies ta essencial y ta haci e trabou di parlamento hopi mas efectivo. Diahuebs, apenas un dia despues, den e reunion publico pa aproba e presusuesto supletorio pa aña 2015, oposicion a haya e oportunidad pa demostra cuanto nan ta aprecia y usa e analysis y consehonan di Raad van Advies. Pero durante di henter e reunion cu a dura 12 ora largo, oposicion no a ni menciona e palabra Raad van Advies. Straño? No! E splicacion ta cu e analysis di e presupuesto 2015 y e conclusion di Raad van Advies no ta loke oposicion kier tende. E analysis y conseho di Raad van Advies no a cumbini nan, pasobra Raad van Advies a conclui cu e deficit pa aña 2015 a resulta manera gobierno a fiha na comienso den e presupuesto. Pesey nan no a ni papia didje. Den e reunion e lider di fraccion di AVP na dos ocasion a puntra oposicion ta pakico nan no ta cita Raad van Advies como e organo di conseho mas halto di nos pais. Pero e no a haya niun reaccion di oposicion. Oposicion a prefera di usa e analysis y conseho di CAFT, pero sin inclui e splicacion di e minister di finansa pakico e analysis di CAFT ta incorecto. Ora a mustra oposicion di MEP y PDR riba esaki, e silencio di nan banda tabata resona den e sala.

OPORTUNISMO
Oposicion tin un forma oportunista di traha. Awe nan por bisa un cos y mayan nan ta nenga. Awe nan por ta na fabor di algo y mayan nan ta contra. Awe nan ta cu bo y mayan nan ta contra bo. E oportunismo aki ta bisto den tur cos cu nan haci. E actitud di e partidonan di oposicion pa cu e refineria ta un ehempel. MEP a forsa seramento di e refineria. Ora a logra habri e refineria nan a bay contra. Awor cu tin un chens pa habri e refineria atrobe, nan no kier papia di e daño cu nan a causa Aruba y miles di famia. Nan ta haci como sifuera ta nan ta bay habri e refineria.
Nan posicion pa cu trahadornan ta mescos. Ora a introduci e areglo pa trahadornan den sector priva y pa pensionadonan pa haya placa di caha di gobierno ariba nan entrada ("reparatietoeslag"), oposicion a bay contra. Ora a introduci indexering pa trahadornan di gobierno y maestronan di scol, oposicion a yama esaki gastamento di placa y mal maneho. Awor cu a dicidi di aumenta e salario minimo cu 2.5% otro aña, oposicion ta keto keto. Ta ki dia nan ta bay ta sincero cu trahadornan.
Rene Herde': "Oportunismo ta un mal consehero. Aparentemente oposicion na Aruba no tin un opinion di nan mes con nan kier pa Aruba bay dilanti. Kico cu haci nan ta contra. Nan ta sinta warda pa gobierno haci eror of pa algo malo pasa, pa nan grita y haci desorden. Pero puntra nan con nan kier pa Aruba bay dilanti, ta palabra bashi y frasenan gasta so bo ta tende."

Expresionnan haci den e articulo aki no necesariamente ta refleha opinion di ArenaPoliti.co