MEP a tuma nota di un articulo di prensa den cual Baba Herde di AVP ta haya ta bon pa bin papia malo atrobe di nos Lider bisando e Lider di MEP ta gaña y ta trata e instancianan manera Raad van Advies, Banco Central y Algemene Rekenkamer malo y ta ofende esnan cu ta traha den e instancianan aki. Aki atrobe desesperacion ta pone Baba skirbi cosnan foi sla y bolbe gaña riba hende drechi pa asina busca forma di tapa su mesun fayonan. Pasobra si Baba a respeta Raad van Advies, Banco Central y Algemene Rekenkamer awe no lo tabata tin un desastre financiero.

RAAD VAN ADVIES
Na varios ocacion Baba a falta respet na Raad van Advies door di pone nan consehonan un banda. Por ehempel,  si Baba a sigi e conseho di Raad van Advies riba presupuesto 2014 awe nos no mester ta pasando den e berguensa di un KB y CFT. Pero Baba kier a hunga wrong and strong y mustra cu 13 asiento ta conta mas cu cualkier conseho di Raad van Advies y laga e instancia pasa pa hende kens. Un falta di respet cu awe a pone KB riba Baba su cabes y CFT a dune un brevet van onvermogen pa su mal trabou. Si Baba a respeta trabou y conseho di e instancia respeta awe e lo no a vota pro pa presupuestonan irealistico y cos por tabata otro na Aruba. Pero Baba a kies pa tuma e profesionalnan di e instancia pa hende kens faltando nan respet.

BANCO CENTRAL
Baba ta lubida cu Banco Central tur tempo a raporta e cifranan di finanzas publico y na 2011 caba e Presidente di Banco Central a bisa cu bou gobierno di AVP nos ta conciendo cifra di deficit y debe nunca antes bisto. Banco Central su Presidente a hasta adverti den e Comicion Financiero di Parlamento cu Aruba ta technicamente bancarota. Pero Baba no a worry cu nada y a mustra cu 13 asiento tin mas peso cu cualkier informacion y advertencia di e profesionalnan di Banco Central. Baba a falta nan tur respet door di ignora nan advertencia y haci locual su gobierno kier.

ALGEMENE REKENKAMER
Den e cuentanan anual di Pais Aruba e profesionalnan di Algemene Rekenkamer a mustra con Gabinete Eman a abusa di e mandato di Parlamento door di gasta mas placa di Pueblo cu ta permiti. Pero Baba a mustra nan tambe cu 13 asiento tin mas balor cu cualkier rapport di profesional y a bay di acuerdo pa grita voor burlando di tur e conclucionnan valioso di e raportnan di Algemene Rekenkamer.

RIOOLPOLITIEK
Baba a falta respet na tur e instancianan aki anto awe e kier bin tilda lider di MEP pa su propio fayonan. Baba definitivamente mester stop cu e politica di riool aki y busca moda di drecha su erornan lagando hende drechi afor.

Expresionnan haci den e articulo aki no necesariamente ta refleha opinion di ArenaPoliti.co