Durante 2010-2014 deficit y debenan di Aruba a kibra tur record! 

Ta parce cu dia pa dia e lider di fraccion di AVP Baba Herde ta actua mas bruha cu nunca y den forma terco y manera un avestruz ta keda hinca su cabez mas y mas hundo den tera. Den e siman aki Baba Herde den un comunicado a bolbe toca e topico di crecemento economico, caminda el a compara e desaroyo economico durante Gabinete Oduber y Gabinete Eman. Sinembargo den henter su letania un biaha mas Baba no kier a toca e aspecto financiero di pais Aruba, ya cu politicamente esaki no ta cumbini su persona. Locual Baba a pronkia cune tabata e supuesto crecementonan economico durante e periodo di 2010-2014, lubidando cu mester acopla esaki na e parti financiero. Hecho ta cu ora un pais conoce crecemento economico substancial, esaki mester por ser mira tambe den e entradanan di gobierno. Pero durante e ultimo 5 añanan esaki no ta e caso, ya cu desde 2010 e entradanan di gobierno a keda riba e mesun nivel abao, esta di mas o menos 1.1 biyon florin.

Desaster financiero
Ya cu Baba Herde pa motibo di oportunismo politico ta capricha y redondamente no kier papia di finansa publico, MEP ta haya su mes obliga – mediante di un tabel compila di cifranan di Banco Central – trece padilanti e dos indicadornan di mas importante den finansa publico, cualnan ta e deficit financiero y e nivel di debenan di nos pais. Nos por mira claramente den e tabel cu durante e periodo 2010-2014 (Gabinete Eman) tanto e deficit financiero como e debenan di pais Aruba a kibra tur record, caminda segun promedio  ambos a mas cu cuadruplica (4 biaha) y esaki compara cu e periodo di Gabinete Oduber (2002-2009). Mester remarca aki cu e unico 2 biahanan cu nos pais a conoce un surplus den su presupuesto tabata na 2003 y 2008, esta durante Gabinete Oduber! Hecho ta cu esaki ta e periodo di 2010-2014 ta e periodo di desaster financiero di mas grandi den historia di nos pais y cual a ser señala tambe pa tanto IMF, Fitch, Standard & Poor’s y CFT. Un desaster inmenso crea pa Gabinete Eman y cu lo dura te cu 2034 pa yega bek na e nivel di debe cu Gabinete Oduber a laga atras na 2009.

Medidanan cruel
Sinembargo creando tur e debenan astronomico aki, esaki no a conduci na un bienestar positivo pa e ciudadanonan di nos pais. E salario minimo cu durante gobernacion di MEP a aumenta na 7 ocasion yegando te na 1543 florin, awe ta stagna na 1637 florin den 5 aña y alavez edad di bay cu pensioen a aumenta te 65 aña. De vez en cuando gobierno manera un bon Samaritano ta gaña duna tur trahador un reparatietoeslag di un miserabel 50 florin pa luna y cual toeslag lo wordo elimina definitivamente na 2018. Empleadonan publico a wordo masacra cu cortamento na mitar di nan duurtetoeslag, franchise, eliminacion di nan bashi premie y gelijk bedrag y aumento di edad di pensioen te 65 aña. Desempleo na e momento aki ta alarmante y ya a surpasa 13%, mientras cu gobierno ta sigui manipula cu un cifra di bao di 7%. Si na 2009 tabata tin 1846 hende ta cobra onderstand, awe esaki a aumenta y yega te na 2711. Durante e ultimo 5 añanan medidanan cruel a azota cartera di tur ciudadano cu aumento di prima di AOV, AZV, Health tax, inkomstenbelasting, grondbelasting,  cortamento di subsidio, pago pa recoge sushi, aumento di schoolgeld y collegegeld, aumento di prijs di coriente cu 15%, aumento barbaro di costo di bida.......y ainda falta.
Pues por conclui cu mientras Baba Herde ta gaba cu cifranan di supuesto crecemento economico durante 2010-2014, e realidad di 2015 y e añanan siguiente ta cu nos pais ta tecnicamente bancarota, un pueblo cu dia pa dia ta birando mas pober y cu e futuro generacionnan mester bay paga pa tur e fechoria y malgastamento di placa di pueblo door di e gobierno cu Baba Herde ta sostene ciegamente.

Expresionnan haci den e articulo aki no necesariamente ta refleha opinion di ArenaPoliti.co