ORANJESTAD – E programa Sociaal Vormings Traject SVT, miho conoci como Formacion Social a culmina e entrenamento di su di shete grupo. Nuebe hoben a ricibi nan certificado for di man di Minister Paul Croes y Commandant Jan ten Hove. Formacion Social ta brinda hobennan un di dos oportunidad den bida pa cambia caya y mal habitonan, pa un disciplina y capacitacion pa trabou.

Despues di e prome fase cu ta cuater luna di entrenamento fisico, trabou den ekipo y tambe disciplina, e di dos fase ta consisti di lesnan cu ta atende na Enseñanza pa Empleo riba e tema di nan escogencia cu ta inclui idiomanan y mecanica, hoteleria, etc. Den e di tres y ultimo fase, e hobennan ta core stage na un compania local cu por ta den tereno industrial, hotelero of comercial.

Cu satisfaccion oficina di Formacion Social por bisa cu mayoria di e hobennan cu a ricibi nan certificado e siman aki ya caba tin un trabou na e luga caminda nan e core stage. Esaki ta muestra di e nivel halto di capacitacion y resultado cu e programa ta produci.

Un promedio di 10 hoben ta completa cada grupo loke ta nifica cu Formacion Social desde 2002 a capacita y reintegra riba 70 hoben bek den comunidad pa biba y fungi como ciudadanonan activo y responsabel di nos pais. Ta 70 famia cu awo ta biba mas trankil y contento sabiendo cu nan yiu, ruman of pareha a haya e oportunidad y sosten cu e tabatin mester pa duna un giro na nan manera di wak y biba bida pa bay den un direccion mas probechoso.

Graduadonan di Grupo 7 ta: Shaviën Nathan Dania di 20 aña, Rugerie Jurvin de Mey di 22 aña, Derick Henderson John di 23 aña, Carlos Minguel Segundino Maduro di 22 aña kende ta e miho graduado di e grupo. Huntu cu nan tin tambe Justin Renato Petrochi di 21 aña,  Rosini Joacquin Ruben Ras di 19 aña, Michel Angelo Estanislao Rasmijn di 23 aña, Setchel Chris Rijsdijk di 24 aña y Japhet Josiah Rogers di 19 aña.

Mientras tanto, Grupo 8 di Formacion Social a cuminsa bek na augustus y ta programa pa caba na augustus proximo y inscripcion ainda ta habri pa grupo 9 cu ta cuminsa na luna di februari. Esnan interesa por pasa libremente na oficina di Formacion Social na base di Marinierskazerne na Savaneta pa mas informacion.

Expresionnan haci den e articulo aki no necesariamente ta refleha opinion di ArenaPoliti.co