Aña ta transcuri y hopi ta esnan cu ainda kier tende e stem di Betico. Betico Croes un homber di un famia humilde kende a pone un solo meta su dilanti esta pa libera e pueblo di Aruba for di gara di otro islanan pa asina Aruba por ta su mesun doño y tuma su mesun decisionnan garantisando e prosperidad y felicidad di henter e pueblo. Mi tabata tin e honor na un edad hopi hoben di conoce Betico. Mi querido papa “Efe” (q.e.p.d) manera Betico tabata yam’e tabata un di su gran amigonan. Como mucha nos a lanta hopi cerca cu Glenbert y tur su rumannan mientras Betico y Efe tabata campaña nos a comparti hopi tempo bunita den infancia cu otro. Tanta Glenda y Sofia tambe cu nan amistad impresionante. Betico su ideal y deseo tabata pa mira henter e pueblo feliz, no obstante tur e obstaculonan cu e mester a subraya pa por a logra e anhelo di e pueblo esta “Status Aparte”. Te hasta den e Himno di MEP por scucha e refran “Kibra e cadena di esclavitud pa nos dushi Aruba ser salba”. Esakinan ta muestra di e meta y determinacion cu Betico tabata tin pa cu su idealnan. Como mucha mi ta corda multiple momentonan cu nos a comparti cu “Tio Betico” manera nos tabata yam’e.  Mi tabata presente riba e famoso “Barco di Libertad”, 24 di April 1983, dia cu Betico a wordo tira pa e polis Libier na veld di Winston. Mi por corda cu 12 di Maart 1983, dia di Ronde tafel conferentie unda e famoso dicho a cay na Hulanda “De Kogel is door de Kerk”. Betico a yama Aruba y ami a contesta telefoon. Aunke mi no tabata compronde hopi di politica e tempo ey Betico a splicami den un tono di alegria “Pasami cu papa Efe paso nos a logra algo grandi pa historia di Aruba, esta nos “Status Aparte”. Despues cu Betico a caba di combersa cu Efe mi ta corda cu Efe a bay pafor cu lagrima den wowo gritando Aruba Liber, Aruba Liber, Aruba Liber y a bay informa su empleadonan cu tabata trahando e tempo ey bao dak cu heavy equipment.  Betico a accidenta no mucho leu di cas di mi mayornan. Aki tambe mi tabata tey y a observa momento cu nan tabata libera Betico for di e doloroso impacto promer cu aña a termina.  Despues di a sufri e accidente fatal mi por corda di a bishita Betico varios biaha na Maastricht y lamentablemente e siman cu el a wordo traslada pa Utrecht unda mi tabata biba y studia, Betico a fayece. Glenbert a bel mi rond 6am ora di Hulanda y a bisami “Endy, Papi a bay laga nos, bay hospital y warda riba nos”. Asina mi por recorda mi tabata e promer persona cu a yega y a warda Guisette y familiarnan y hunto nos bay na cama di Betico y a permanece pa algun ora eynan. Asina mi mester bisa cu desde mucha mi a lanta hopi cerca di nos Libertador Betico Croes. Como un bendicion special mi yiu homber a nace riba riba mesun fecha natal di Betico, esta 25 di Januari. Betico su amor patrio y amor pa su pueblo ta hopi grandi. Den tur su speechnan por nota e amor incondicional cu e ta desplega pa su pueblo. Carisma no tin pa iguala.  Pa por a logra kibra tur barera moviendo montaña pa convence Hulandesnan pa Aruba logra  “Status Aparte” ta dunele su STATUS unico. Betico simplemente e homber humilde di Santa Cruz  cu a unifica henter un pueblo merecidamente ta E HEROE di nos baranca Aruba. Pabien Aruba y ban celebra Dia di Betico engrande dialuna awor. Corda hisa bandera di Aruba!

Expresionnan haci den e articulo aki no necesariamente ta refleha opinion di ArenaPoliti.co