Despues di a hiba un cantidad di reunion cu Minister Otmar Oduber y mas colega 

ORANJESTAD - Minister President Mike Eman, awe despues di un serie di reunionnan sosteni cu Minister Otmar Oduber, otro ministernan y den seno, hunto ta positivo cu lo tin trankilidad y union den gobierno pa dedica hunto na futuro di Pais, manera cu pueblo a duna e mandato.

Minister President Mike Eman ta splica cu tanto como Formador y como Minister President a hiba un serie di reunionnan cu Minister Otmar Oduber, a coordina tambe encuentronan entre Minister Oduber y otro coleganan cu awe culmina den un ambiente positivo y constructivo. Tur hende a scucha otro cu atencion, respet colegial y cu miras riba e trabounan grandi nan dilanti, a pone e base pa hunto sinta den un cumbre den fin di siman aki pa coordina prioridadnan di tur Minister pa e añanan nos dilanti.

Minister President Mike Eman ta splica cu su tarea tabata pa yuda kita e falta di comprondemento cu por tabata tin, crea e ambiente di comprension pa por organisa un cumbre entre e Ministernan pa coordina prioridadnan. Awe Minister President Mike Eman tabata tin e ultimo encuentro aki hunto cu lider di fraccion di AVP, Rene Herde, Minister Otmar Oduber  y algun Minister. Resultado di tur e encuentronan aki a culmina awe den un ambiente positivo pa un cumbre constructivo entre Ministernan den fin di siman.

Minister President Mike Eman ta contento cu por a hiba e combersacionnan aki den un bon dialogo pa por a duna atencion na temanan cu Minister Oduber y diferente Minister a pone riba mesa y yega na e punto positivo aki. Despues di e cumbre entre Ministernan den fin di siman ta duna informacion riba palabracion y prioridadnan cu ta keda coordina y palabra den e cumbre.

Mientrastanto Gabinete completo a manda nan contestanan riba Presupuesto 2016 pa Parlamento pa esaki por wordo trata tambe otro siman. Un Presupuesto cu por cierto ta realisa un reduccion grandi di deficit y ta cumpli cu e norma di 2% manera hancra den e ley di CAFT.

Cu esaki Aruba ta yega den un corto tempo na un cifra di deficit mas abao cu nos a yega di conoce den hopi tempo. Cu union den gabinete y metanan bon coordina Minister President Mike Eman ta bisa di ta mira e añanan dilanti como hopi positivo pa Aruba.  

Expresionnan haci den e articulo aki no necesariamente ta refleha opinion di ArenaPoliti.co