Den medionan di comunicacion partido UPP a tuma nota di declaracionnan di Prome Minister Mike Eman, kende ta anuncia cu e benta di propiedad di refineria, esta e parti di benta di gasolin y e stacionnan cu lo ta propiedad di Valero, ta trece por lo menos 60 miyon florin pa Pais Aruba. Ya caba e decision a cay segun Eman, cu lo bende e propiedad aki, y cu a pidi Utilities Aruba N.V. pa cuminsa mira e mercado pa un cumprado potencial pa e propiedad aki. E interesado(nan) obviamente lo mester ta un persona cu por carga un inversion miyonario asina sin mas y tin lasonan intimo cu e gobierno.

Ra ra ra, kende lo bay haña e privilegio pa haci e inversion millonario aki? 

Cua famia of amigo compinchi lo haya esaki? 

Tabata e intencion, desde comienso, pa Roberto Rincon haya esaki mirando cu e tabata wordo considera un "bon hende". 

Tur investigacion, hasta conduci te na halto nivel segun minister Mike de Meza, no por a haya nada negativo contra di dje? 

Sr. Rincon tin sigur e capital necesario pa inverti, pero no ta e so. Tin algun famia poderoso, cu sigur lo ta interesa, y asina amplia nan monopolio y nan hegemonia na Aruba tambe.

 

Di un banda nos por mira cu e ansha pa por cubri e fayonan den nos finanzas public, ta asina grandi cu, apesar cu e traspasonan ni sikiera a tuma lugar ainda, ya caba a cuminsa ta busca un “cumprado potencial”.

Ta conoci con Mike Eman tabata tin su dilema grandi,esta sea inverti na un hotel y cumpli cu minister Oduber, of reapertura di e refineria y soporta e indignacion di Otmar Oduber cu tur posibel consecuencia pa gobierno (loke a sosode tambe). 

Mike Eman sinembargo a escohe - pa scapa mas berguensa cu un posibel intervencion di gobierno di Reino - pa un reapertura di refineria. 

Pa suavisa e critica di esnan cu a kere den su vision “green”, Eman a laga su alumno Mike de Meza negosha e uso di gas pa fuel e refineria, y asina bende na nos pueblo cu a tene debidamente cuenta cu e impacto ambiental. 

Na final di cuenta importante pa sr. Eman ta e impacto grandi riba entradanan pa Pais Aruba. Eman ta papia hasta di 100 miyon florin, loke ta nifica mas entrada cu loke departamento di impuesto lo por a trece aden.

 

Den pasado UPP a remarca na varios ocasion riba e sistemanan di paisnan Nordico, unda cu tanto un sistema di impuesto rigido of destinacion di fondonan for di loke ta saca e.o. bou subsuelo, ta wordo hinca den fondonan nacional, y cu ta contribui na desaroyo, progreso y bienestar di e ciudadanonan. 

Apesar cu p.e. impuesto por ta halto, pero practicamente tur servicio cu estado ta duna ta gratis. Asina por menciona e sistema educacional, unda cu tur ciudadonan hoben y bieu tin oportunidad di desaroya nan mes. 

E paisnan aki ta wordo considera paisnan cu ciudadanonan satisfecho y feliz.

 

Pregunta di UPP ta, pakico nos tambe no por actua den e sentido aki? 

Pakico pensa den bende algo, cu na mes momento nos sa cu lo no disparce, ya cu benta di gasolin semper lo keda. 

Dicon no por haci cu e ganashi di benta di gasolin ta wordo mitiga, pa baha e costo na nos pompnan di gasoline, y e ganashi bay den un fondo nacional cu ta wordo bon vigila y cu ta sirbi pa mehora nos calidad di bida? 

Pero no, prome pensamento ta pa bende e facilidadnan aki. 

Esaki tambe ta conta pa e situacion di e transhipment. Na momento cu e transhipment ta den man di Pais Aruba, cualkier operador di un refineria por conta riba cooperacion di Pais, pasobra e no ta den man di un tercera of den man di un compania aheno cu lo kier saca probecho. Tambe e lo no por bira instrumento di chantage dor di un compania asina, pa sea stroba otro desaroyonan of exigi mas privilegio di gobierno.

 

Durante di e reunion di Parlamento, unda ta tratando e presupuesto 2016, minister de Meza tambe a referi na un fondo nacional asina, a la Noruega, pa loke ta eventual prosperidad cu boramento di gas y extraccion di gas lo trece cu ne. 

Papia bunita, pero no ta bin cu e hechonan. 

Si esaki ta e intencion, anto lo mester a cuminsa traha caba riba un concepto di ley, pa asina crea dicho fondo, basa cu un sistema di control bon sera, pa evita cu abuso ta wordo haci cu placa di pueblo. 

Den cuadro di e pensamento aki tambe ta, pakico no cuminsa e ora ey cu e facilidadnan di benta di gasolin? Lo no ta mihor pa e facilidad aki bira un compania estatal, y cu medionan di ganashi alfin lo por bay den un fondo asina?

 

Ban mira kende ta e privilegiado pa haya e facilidadnan aki!

Aruba, Quo Vadis?!

 

 

Den nomber di Union Patriotico Progresista – U.P.P.

Candelario A. S. D. – Booshi – Wever

Brazil, januari 29, 2016