UPP a alerta nos pueblo cu e viahe di Mike E. pa Hulanda tabata simplemente un “smokescreen” pa gana tempo, y UPP ta haya razon un biaha mas si nos analisa e reaccion di Mike E. ora el a regresa for di Hulanda.

Loke a resalta den e splicacion di Mike E. entorno su biahe pa Hulanda, ta na unda e ta bisa cu esaki tabata un “eye-opener”, y cu nan a pidi experticio di Hulanda den e toma di decision cu tin di tuma lugar: hotel of refineria. Dos punto cu a resalta, na unda atrobe Mike E. ta purba di hunga cu e inteligencia di nos Pueblo, ta ora e ta bisa cu gobierno di Aruba mester consulta cu su partner di Reino, esta Hulanda, pa cualkier combenio cu Aruba cera cu companianan internacional.
Tambe e ta bisa cu e factibilidad y probabilidad di un reapertura ta depende te con leu e compania CITGO lo mester acepta un partner y tambe haci inversionnan pa crea un refineria “green”.
E argumento cu lo mester atende cu Hulanda y e ministerio di Asuntonan Externo, pasobra ta trata di un compania internacional, ta bastante fofo.
E ultimo añanan aki, Mike E. su gobierno a cera diferente MOU, diferente contrato cu companianan internacional (varios di e contractonan cu ta hole na corupcion), sin a atende cu Hulanda riba nan. Nos por bisa e.o. pa Hospital, OHL Arellano, Deutsche Bank, Credit Suise, ODINSA, Principe Bahia, pa menciona algun.
Dicon esaki awor si ta importante?

E otro aspecto cu Mike E. a vocifera ta esun cu mester bin cu un refineria “green”. E expresion aki, y cu loke nos por a scucha di Otmar O. siman pasa, ta acentua e.o. e “dilemanan” di Mike E.
Pa straño cu e ta zona, Mike E. no ta mira e necesidad cu tin pa crea mas trabou di un banda pa nos Arubianonan, pa asina nan haya “green” pa por duna nan famia di come, ni tampoco pa yuda e caha publico di gobierno, pero pa por alivia e presion cu awor aki ta existi riba nos hendenan y nan cartera.

Pa cuminsa nos kier a enfatisa cu den nos programa pa eleccion 2013 nos a pone nos dilanti cu si no tin opcion mas pa un refineria aki na Aruba, mester cuminsa pensa riba alternativanan pa un desaroyo economico duradero.
Y den esaki nos a papia di “industria limpi”, esta cu mas bien ta tene cuenta cu nos medio ambiente (mama tera) y cu ta hi-tec, pa asina por ofrece oportunidadnan na nos Arubianonan bon prepara particularmente riba e tereno technico.

Nos a duna di conoce tambe recientemente - mirando e situacion cu e gobierno di AVP a hinca nos pais y nos Pueblo aden - cu pa e proximo tempo, pa por minimalisa e dañonan financiero y baha e presion riba nos unico industria, esta turismo, un reapertura, si e ta factible, nos lo ta acepta esaki.

E situacion financiero di Aruba ta precario, y enbes Mike E. mustra aunke ta un tiki di sensates pa goberna e isla, lamentablemente UPP tin di constata cu Mike E. ta keda cu su locura di "green".
Mike E. den su desesperacion ta pone como condicion cu mester crea un refineria “green”. E ta un locura pa den un termino masha cortico, di apenas algun luna, haya un inversionista asina leu pa por cumpli cu un exigencia asina, y e pregunta ta si algo asina ta hasta factibel.
Es mas, nos por comparti e opinion di bini cu un refineria cu ta minimalisa e emision di gas dañino, pero den forma “clean-technology” (por ehempel haci uso di gas), cu ta algo mas diferente cu loke e ta pretende.

Tambe nos por mira cu Mike E. ta papia cu mester di un evaluacion “juicioso” prome cu yega asina leu, y p'esey tin un grupo di experto poni eynan cu e intencion pa por studia e miho posibilidadnan.
Ariba dje, ta bin acerca e exigencia di tecnologia green, cu mas bien - pa e 4 luna cu ta resta - casi sigur nan ta poniendo e inversionista hala atras.
Mike E. a declara claramente cu lo tin un “time-limit”, y cu pa comienzo di otro aña, si no tin un decision clave, esaki ta nifica cu lo mester continua cu e desmantelacion.

Un biaha mas loke ta wordo poni aki dilanti dor di Mike E., ta un indicacion pa nos cu lo NO bay tin un reapertura di e refineria, y keto bay Mike E. ta keda hunga cu sentimento di pueblo y purba gana tempo pa regla su “dilema”nan!!                      

ARUBA  Y  ARUBIANONAN,  QUO  VADIS??

Den nomber di Union Patriotico Progresista – U.P.P.
Candelario A. S. D. Wever
Brazil, augustus 26, 2015

Expresionnan haci den e articulo aki no necesariamente ta refleha opinion di ArenaPoliti.co