Partido ABO: Awor gobierno a bira un ‘Zikario’, pa su politica di ‘Avestruz’
Dialuna 22 di februari 2016, BBC a publica un informacion caminda nan a reporta cu e situacion di casonan di Zika y e malesa di ‘Guillain-Barré’ na Venezuela, ta hopi mas halto di locual e gobierno Venezolano ta admiti. Segun e informacion aki, e cifranan oficial di Venezuela ta papia di 5000 casonan, mientras cu mediconan ta papia di entre 400.000 y 500.000 casonan: pues ‘under-reporting’.
E informacion aki ta pone nos corda algun siman atras, mientras nos di partido ABO hunto cu algun medio di comunicacion local tabata trece e informacion di e peliger di e virus Zika na atencion di pueblo, gobierno, parlamento y e partidonan politico tradicional a scoge pa keda drumi. Despues cu World Health Organization (WHO) a categorisa e virus Zika como un menasa mundial, nan a lanta for di nan soño. Y con gobierno a scoge pa cuminsa actua? Exacto, cu algun show di Aruba Tourism Authority (ATA), pone un advertencia di color en algun medionan di comunicacion y hopi tempo despues, e PR-show di e minister di Salubridad. Den su afan pa mustra pueblo cu semper e problematica di e virus Zika tabata tin su atencion, el’a declara: ‘gobierno tabata sa di algun caso di e virus Zika, pero a scoge pa no bisa nada pa no causa panico’.
Interesante observacion. Pasobra mientras cu henter e continente Latino y region Caribense tabata informa nan pueblo (dus no solamente algun gremio turistico) y fumiga, aki na Aruba gobierno a scoge pa ‘no causa panico’. Con creibel esaki ta zona? Na Colombia tin, te cu siman pasa 37.011 caso registra di hende infecta cu e virus Zika. Gobierno Colombiano ta premira cu esaki lo por yega te cu entre 600-700 mil casonan. Nan tin 6.356 femenino embarasa confirma cu e virus y tambe 83 caso di hende cu e malesa di ‘Guillain-Barré’ (Instituto Nacional de Salud). Mientras gobiernonan den region a cuminsa fumiga, informa pueblo y haci datonan di e desaroyo di e virus Zika publico, aki e gobierno cu ta custumbra di gaña y manipula pueblo pa di lastro cos, kier laga pueblo kere awor cu pasobra e no tabata ‘kier causa panico’, e no a informa pueblo na tempo.
Esaki ta un otro ehempel caminda gobierno ta demostra cu e interes di pueblo no ta su interes. Hasta un mucha di 5 aña por a anticipa cu e virus Zika lo yega Aruba, manera tur pais rond di nos tabatin e virus Zika y cu no tabatin mester di warda e ‘confirmacion di Hulanda’ pa actua. Awor den pura, e minister di Salubridad kier ‘steal the show’ cu gobierno lo aloca 500.000 florin pa combati y informa pueblo. Interesante pa sa cuanto placa e show di ATA a costa. ‘Luchtvaartnieuws’ di diasabra: ‘Aantal boekingen naar Latijns-Amerika en het Caribisch gebied is wereldwijd gedaald als gevolg van het zikavirus’. Preguntanan na e minister di Salubridad:
- Cuanto panico e actitud di ‘no kier causa panico’ lo causa awor?
- Kico ta e situacion actual y real aki na Aruba? Pues minister, no tene ‘compasion’ cu pueblo y bisa e berdad awor!
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...