Diamars minister di infrastrcutura Benny Sevinger tawata den parlamento pa trata e presupuesto di DOW pa anja 2016. Den e presupuesto aki nos por a mira un cantidad di proyecto cu DOW a pone riba agenda pa ehecuta. Un proyecto cual si a haci hopi falta riba e lista aki ta e proyecto di e scol Mavo/Havo/VWO na Noord. Un proyecto cu gobierno di MEP a laga atras kant en klaar. Tawata tin henter un project dossier cu a wordo laga atras, tawata tin placa cu a wordo laga atras, tawata tin un tereno destina caminda e proyecto aki mester a bin pero lamentablemente e gobierno aki despues di 7 anja ainda NO ta mira esaki como prioridad. Ta un lastima cu e fondonan cu tawata tin disponibel pa e proyecto aki a wordo usa pa e proyecto di tram. Un gobierno cu ta scohe tram riba un scol mester bai cas. United Nations tin un lista di prioridad cu un pais mester tene cuenta cune ora e kier ta sostenibel. Como number uno riba e lista ta combati pobreza, sigui pa combati hamber, un bon cuido medico y na di cueter lugar un calidad halto di educacion. E gobierno aki no ta combati pobreza, no ta combati hamber, cuido medico ta na werki y educacion sigur ta riba ultimo lugar. Na momento cu bo ta neglisha bo future generacionan y bo ta ignora e necesidad di un scol di mavo/Havo/VWO na Noord como gobierno bo ta actuando completamente robez.

Durante e reunion aki nos fraccion a cuestiona minister Sevinger riba e escandolonan cu tin actualmente rond di su maneho. Un maneho cu ta pone como prioridad pa duna amigonan di Benny Sevinger terenonan di pueblo pornada pa e mesun amigonan aki bai haci negoshi y bende esakinan y bira miyonario riba custia di pueblo. No por ta asina cu un compania ta pidi gobierno un tereno pa keda sin desaroya esaki y pa despues pone esaki an benta. Tin asina tanto prueba caba cu a wordo presenta y te ainda e minister ta keda man cruza sin kier actua.  No solamente esaki a wordo cuestiona pero tambe e hecho cu pueblo no ta haya tereno pero e ‘’amigonan’’ di e minister.

Loke mas nos ta lamenta ta e hecho cu mientras amigonan di benny Sevinger ta haya terenonan pa bende, e minister NO a percura pa FCCA haya tereno pa construi casnan social. Tin un demanda hopi halto pa casnan social y e lista di espera ta mas cu 3000 persona pero manera Benny Sevinger a contesta nos den parlamento, I DON’T CARE. Ora nos a puntre dikon pueblo no ta haya tereno y su ‘’amigonan’’ si ta haya tereno pa bende su contesta tawata mesun cos. I DON’T CARE. Na momento cu un minister tuma un actitud arrogante asina y ta bisa cu no ta importe cu tin 3000 hende wardando pa un cas social, cu tin 11,000 hende wardando pa un pida tereno y no ta importe ki hende ta pensa cu e ta yuda su amigonan cu tereno ta pasobra e mester saca su conclusion y bai su cas. E pueblo aki si ta CARE pa haya un cas social, e pueblo aki si ta care pa haya un pidi tereno y e pueblo aki si ta haya cu Benny Sevinger ta abusando di su autoridad di fiesta cu patrimonio di pueblo!

Expresionnan haci den e articulo aki no necesariamente ta refleha opinion di ArenaPoliti.co