Minister di Finansa sr. Angel Bermudez a invita algun top-experto di FONDO MONETARIO INTERNACIONAL (IMF) pa bin traha cu expertonan di Banco Central di Aruba, riba un institucion independiente pa conseho, guia, evalua y si mester yuda corrigi e maneho financiero di gobierno den futuro. Esaki ta un bon desicion sin mas. Pero mas cu esey e ta demostra un determinacion cla pa sigui cambia finansa publico di Aruba for di paden y pa manten'e sano den futuro. E no ta un desicion politicamente popular. Hende lo por bisa cu gobierno no por controla su mes. Pero expertonan a splica ta cuanto pais rond di mundo, chikito y grandi, rico y no rico, cu ya a crea un institucion pa haci e trabou aki den nan pais. E exito di e institucion cu den hopi pais yama un CONSEHO FISCAL, ta varia. Den paisnan grandi manera Francia y Inglatera e no a funciona bon. Den otro paisnan manera Canada, y Suecia si ela funciona hopi bon. E diferencia ta den cuanto uso ta haci di e conseho y guia di un institucion independiente asina. Tanto Minister Presidente Mike Eman, como Minister di Finansa Angel Bermudez, a mustra y argumenta den forma firme e importancia di e Conseho Fiscal pa Aruba. Nan ta duna confiansa den creasion di un instancia importante asina y den su influencia riba maneho financiero den futuro.

CFT of CONSEHO FISCAL
E discucion cu tin andando awor aki ta si Aruba mester accepta e CFT cu Hulanda lo kier tin aki mescos cu na Corsow y Sint Maarten, of si mester crea un propio institucion pa Aruba mes. E discucion ta wordo determina pa un gran parti pa e pregunta di con independiente un Conseho Fiscal lo por ta. Riba e pregunta aki Rene Herde' di fraccion di AVP tabata tin e siguiente contesta:"E idea pa crea un Conseho Fiscal pa Aruba no ta di awor. E "Nacional Commission on Public Finance" a conseha gobierno di MEP pa crea esaki for di aña 2007. Esaki no a sosode. AVP a propone creasion di un Conseho Fiscal segun e modelo di IMF for di 2009. Hopi prome cu CFT a wordo crea. (2010) Pa loke ta e caracter independiente y totalmente los di influencia politico cu e Conseho Fiscal mester tin, nos por wak con organonan manera Corte di Husticia, Ministerio Publico, Banco Central, Raad van Advies y Controlaria General ta funciona aki na Aruba. For di 1986 nan a wordo institui y apesar di discucionnan cu tabata tin riba nan conseho y desicionnan, niun hende y niun partido ta ni pensa pa mete den e institucionnan aki. Nan independencia y profesionalismo mester ta sigura bou tur condicion y tur gobierno. Esey ta duna confiansa den e institucionnan aki y stabilidad na nos pais. Mescos lo mester sosode cu e caracter di e Conseho Fiscal."

Ta intencion di minister pa e Conseho Fiscal aki cuminsa traha den careda di aña 2016. Te na e momento ey ta intencion di gobierno di Aruba pa haci uzo di e secretariado di CFT di Corsou y Sint Maarten.

Expresionnan haci den e articulo aki no necesariamente ta refleha opinion di ArenaPoliti.co