Gabinete ME II: Prome Minister Eman di bishita na 'Afterschool Alliance' na Washington DC
Un proyecto similar na 'Naschoolse Opvang' di Aruba
ORANJESTAD – Gabinete Mike Eman a bin ta trahando riba un proyecto piloto pa studiantenan di scolnan secundario. Basa riba e idea fundamental tras di Trai'merdia, pero adapta na edad di e hobennan di scol secundario. Prome Minister Mike Eman durante su biahe di trabou pa Washington DC, a bishita 'Afterschool Alliance' cu ta un proyecto similar na loke a cuminsa cu ne na Aruba.
Prome Minister Mike Eman y su delegacion a bishita e instituto aki unda cu el a experencia con e programa ta draai na Merca, particularmente e area di Washington DC. E delegacion a haya un splicacion di Ed Spitzburg, vice presidente pa Gobierno Mericano di e programa 'Afterschool Alliance' na Washington DC. Esaki no tabata prome biaha cu e mandatario di Aruba a bishita e programa aki y ta demostra, segun Spitzburg a declara, cu e mandatario di berdad ta interesa pa mira con e programa ta funciona y con miho pa implementa esaki na Aruba.
E “Afterschool Alliance”, tin un bon acogida den e ciudad y region. E programa ta uno amplio cu ta ofrece e studiante ayudo cu su tareanan di scol, pero tambe actividad di entretenimento varia, manera sciencia, matematica, arte, musica entre otro. E studiantenan mes ta scoge cua programa nan ta sigui y ta haya ayudo di mas cu 100 maestro boluntario cu ta traha cu e programa.
E programa aki ta wordo guia pa Daniela Giorgini, kende ta hopi satisfecho con e ta desaroyando . E ta director general di e 'Afterschool Allstars' na 'Stuart Hobson Middle School'. Sra. Giorgini a splica cu e programa ta tur dia 3 ora, brindando ayudo cu tarea y otro actividadnan special. E ta un programa completo. “Programanan di despues di school ta mantene muchanan sigur, ta inspira nan pa siña y yuda famianan cu ta traha. Pa cada mucha cu nos tin den e programa, tin dos ta sperando pa haya chens pa drenta,” el a splica. Y a agrega cu e muchanan ta gusta e programa pasobra e ta yuda nan prepara nan mes pa universidad tambe.
Gobierno di Aruba ta kere cu un pais desaroya mester percura no solamente pa educacion pa mucha y hoben, pero tambe pa un bon formacion general. Ademas di esey tin un necesidad pa guia di hobennan despues di scol. A forma un grupo di trabou yama 'Commissie Naschoolse Opvang Voortgezet Onderwijs' cu a traha un programa pa hobennan di scolnan secundario por haya guia di huiswerk, bijles y actividad extra curicular manera deporte, arte, musica y formacion civico. Nan a yama esaki e 'Naschoolse Opvang' y a cuminsa cu un proyecto piloto augustus ultimo na EPB San Nicolas.
Durante su bishitanan den bario Prome Ministro Mike Eman a nota cu hopi hoben no tin supervision y guia na cas despues di scol y no tin e oportunidad pa haci algo cu ta beneficia nan den nan formacion general. E studiantenan mes ta hopi satisfecho pasobra e programa ta brinda nan hopi opcion y nan mes por scoge loke nan kier sigui haya mas informacion riba dje.
Expresionnan haci den e articulo aki no necesariamente ta refleha opinion di ArenaPoliti.co