NO BISAMI KIKO NO POR, BISAMI KIKO SI POR 

ORANJESTAD -- Partido AVP a bira un partido hopi negativo. Ultimo tempo cada rato bo ta tende nan bisa cu "NO
POR, NO POR, NO POR". Nada no por mas. Si ta pa nan biaha of fiesta, e ora si por. Pero si ta pa pueblo, nada no por mas! Ami ta cansa di scucha kiko tur NO por, bisami kiko si por. Mi lo duna 3 ehempel.

1. CASTIGO MAS SEVERO PA ABUSADOR SEXUAL
6 anja pasa un mama balente a bin Parlamento cu 11 mil firma y pidi pa castigonan mas severo contra abusadornan sexual, entre otro pa introdusi castigonan minimo. Nos fraccion mesora a traha un iniciativa di ley y a entrega esaki na Parlamento. Na september 2010 Raad van Advies a duna conseho y a sugeri cierto cambionan y nos a hasi tur e cambionan cu excepcion di un cu nos mes no por traha pasobra ta gobierno mester trahe: un parafo den cual ta describi e maneho di gobierno di Mike Eman pa cu castigonan
minimo. Ya na september 2010 nos a cuminsa manda carta pa gobierno pa pidi gobierno manda nos nan maneho y nan vision pa nos por continua cu e ley. Despues nos a manda varios recordatorio. Sinembargo te dia di awe Gobierno no a contesta nos peticion y pesey e ley ta pega ainda. Unico cos cu bo ta scucha ta parlamentarionan di AVP hopi negativo ta bisa NO POR, NO POR, NO POR. Esey nan a hasi tambe ora nan a vota CONTRA di un mocion di MEP pa bin cu e castigonan aki Mi ta cansa caba di tende nan bisa cu no por, bisami kiko SI por pasobra mientras cu gobierno ta stroba e ley pa wordo finalisa, e abusadornan sexual ta sigi abusa.

2. AUMENTO DI PENSIOEN DI NOS GRANDINAN
Durante un reunion publico siman pasa tocante e fondonan di SVB, nos fraccion a presenta un mocion pa hisa e pensioen di nos grandinan cu 2.5% mescos cu e sueldo minimo a wordo aumenta luna pasa. Pero e parlamentarionan di AVP un biaha mas a mustra con negativo nan ta, y a vota CONTRA e aumento di pensioen di biehes, pasobra segun nan e grandinan ya a haya un aumento chikito caba. Esaki ta un argumento cu nos no ta compronde, pasobra unda cu bo bai bo ta topa pensionadonan ta bisabo cu nan no por biba di nan pensioen. Pesey ta increible con parlamentarionan di AVP ta asina negativo y ta bisa NO POR, NO POR, NO POR! Si nos por confia e informacion di SVB - cu nos no tin ningun motibo pa duda - cu e fondo di AOV ta solido, nos grandinan merese un aumento di pensioen.

3. BAHA EDAD DI PENSIOEN NA 62 ANJA
Un otro actitud negativo di AVP bo por mira ora cu MEP a anucia cu lo baha e edad di pensioen bek na 62 anja. Mesora AVP a cuminsa: "NO POR, NO POR, NO POR". Dicon no por? E fondo ta solido atrobe y hasta a regala gabinete Mike Eman 61 miyon florin pa nan por tapa nan buraco financiero. Asina mes, e buraco financiero cu nan a causa cu tanto biahamento y fiestamento. Pa tapa e buraco ey nan a busca un regalo serca SVB di 61 miyon florin! Nos ta bisa: si e fondo ta solido, por baha e edad di pensioen bek te na 62 anja. Y nos lo hasi esey ni cuanto AVP grita cu NO POR! MEP ta kere cu SI por! Pasobra nos grandinan merece mihor.

Solo ta sali pa nos tur y asina nos di MEP lo percura pa brinda proteccion y mehora calidad di bida di nos muchanan y di nos grandinan, segun Evelyn Wever-Croes, lider di partido MEP.

Expresionnan haci den e articulo aki no necesariamente ta refleha opinion di ArenaPoliti.co