Cu hopi satisfaccion Minister Oduber tabata na inauguracion di pier den Rancho 

Fundacion Centro di Pesca Hadicurari conhuntamente cu Fundacion Rancho a celebra un momento importante pa e desaroyo di e bario Rancho cu ta apertura oficial di e pier na waf di Rancho.  Un pier cu sigur no t'ey pa sostene solamente e piscadonan di Rancho segun Minister di Turismo, Transporte, Sector Primario y Cultura, Sr. Otmar Oduber, pero ta na mes momento un motivacion pa e ofishi di pesca sigui ta un tradicion cu ta carga sosten y cu e mandatario ta mira cu ta importante pa conserva esaki. Minister Oduber a reconoce sigur e esfuerso y trabounan grandi di entre otro Clifford Rosa di Fundacion Centro di Pesca Hadicurari y henter e ekipo cu ta traha na bienestar di cada un di e piernan unda cu awor por tin un celebracion na un otro pier mas pa nos piscadonan. E minister ta corda cu 5 aña pasa a reuni cu Fundacion Centro di Pesca Hadicurari unda a pidi pa un maneho mas leu cu e centro di Hadicurari, situa na Noord. E mandatario ta reconoce e bon trabou haci na e centro y lo kier a mira mas di e trabounan aki tur parti di nos isla cu lo sali for di un fundacion cu lo por representa tur e piscadonan di Aruba. E tempo ey a pasa e clubhuis tambe bou di e Fundacion Centro di Pesca Hadicurari cu ta crea e fondonan cu nan a sa di maneha na un forma eficiente cu a logra cu e ultimo añanan a logra bay di Bario pa Bario drechando un cantidad di pier. Sr. Oduber ta splica cu mientras tin algun cu ainda falta pa yega na dje tin otronan cu ya a finalisa e di dos fase caba. Ta importante pa no solamente inverti y traha pier pero e aspecto di mantencion tambe ta hopi importante. Minister Oduber ta mira cu esaki lo bira un trabou caminda hunto cu tur e piscadonan den cada bario, hunto cu e Fundacion Centro di Pesca Hadicurari lo mester por logra. Minister ta recorda un torneo na e mesun sitio aki algun aña pasa unda a bisa cu lo bin bek mirando cu mester un mehoracion den e infrastructura na e pier di Rancho aki. Minister Oduber ta hopi satisfecho di por ta para awe na e inauguracion di un di e piernan di mas bunita cu a keda cla. E mandatario a manda un palabra di felicitacion na tur e piscadonan di Rancho y tambe na Fundacion Rancho cu a sa di persisti y percura pa e trabounan tuma luga unda cu awe por a celebra inauguracion oficial di e pier.
E pier di Rancho a conta cu un inversion di 245 mil florin for di fondo di Fundacion Centro di Pesca Hadicurari. Un maneho cu tin e mandatario convenci cu unabes cu a pone e piernan den man di e fundacion ta e miho decision cu Gobierno por a tuma. A finalisa bisando pabien na tur cu a contribui cu e trabounan y ta keda na cada un di nos pa cuida esaki bon.

Expresionnan haci den e articulo aki no necesariamente ta refleha opinion di ArenaPoliti.co