PELIGER PA PUEBLO!!! 

E minimo cu Bo mester spera cu miembronan di Parlamento ta cu nan ta presenta na trabou. E didos exigencia minimo ta cu nan ta lesa y studia nan documentonan. Siman pasa a trata e didos fase di reforma di e fondonan di seguro social cu ta specialmente importante pa trahadornan cu un entrada bou di 55 mil florin pa aña. Esey ta mas cu 65% di trahadornan na Aruba. Sinembargo e fraccion di MEP of esnan di e fraccion cu a presenta e dia ey a presta pa discuti e tema y presenta mocionnan cu a mustra cu nan no a lesa nan documentonan y nan a djis lansa ideanan pa hala atencion. No tabata tin niun seriedad den nan comportacion. Tur loke nan a haci ta pa purba gana simpatia pero den un forma irresponsabel. Nan actuacion a wordo cualifica como POPULISMO BASHI.

BASHI
Atrobe no ta tur shete miembro di MEP a presenta na trabou. Algun a bin y a bay prome cu e reunion a caba. Majoria di miembronan di MEP NO A NI LESA nan documentonan. Esey tabata bisto. Nan tabata uza cifranan robez y no por a ni haya e cifranan corecto den nan dicumentonan. Nan no a trata e esencia di e ley, pero a concentra riba un parti chikito so y neglisha e parti grandi y e essencia. Esta con ta salba e fondonan pa trahadornan por conta riba esakinan awor y den futuro. Na fin di e reunion MEP a presenta tres mocion cu a demostra cu nan NO ta na altura kico SvB ya a haci y ta haciendo. Nan NO tabata sa cu apensa tres luna pasa SvB ya a aumenta e pensioen di behez cu 2.4%. Nan a propone un calculacion di loke e trahado tin cu haya ora cu e haya cessantia, sin tene cuenta cu e cambio di ley cu AVP a presenta ta pa duna e trahado 50% mas ora e haya placa di cessantia por ehempel pasobra su compania a bay bancarota. MEP a presenta tres mocion puramente pa purba gana simpatia di trahadornan, sin tene cuenta cu e consecuencianan pa e fondonan y pa e trahadornan mes a lo largo. Nan djis NO kier a bay di acuerdo cu e ley y a busca excusanan pa vota contra!

PENSIOEN DI BEHEZ
Aunke e pensioen di behez no tabata tema di e reunion, MEP a propone reduccion di e edad di pensioen, lubidando cu ta e lider di MEP mes a conseha pa hisa e edad di pensioen pa 65 aña. Si gobierno di Aruba a sigui su conseho, awe un cantidad di hende cu ya ta cu pensioen lo mester a traha hopi aña mas. Esaki ta loke Bo ta yama POPULISMO SIN CONTENIDO. O sea bisa y propone cosnan irresponsabel djis pa gana simpatia politico. Ta bon cu trahadornan y nan sindicatonan no ta cay pa e tipo di propaganda politico cu na caminda por perhudica e trahadornan mes!

Expresionnan haci den e articulo aki no necesariamente ta refleha opinion di ArenaPoliti.co