‘mester di un investigacion di calidad profundo.’ 

Examen: Luna di mei y juni di cada aña tin examen y herexamen pa un alumno/studiante cu ta finalisa su estudio secundario. E estudio por ta di scol avansa of scol profesional. Dos luna cu, lastimamente, ta tipifica su mes cu hopi tension y nervio p’e alumno of studiante.

Resultado: Informacion di Relato Estadistico di Enseñansa di Aruba ta duna nos un bon bista riba e resultado di diferente tipo di enseñansa secundario. Den e schema adhunto a inventarisa resultado di diferente tipo di enseñansa di aña escolar 2009/2010 pa 2013/2014. Esun di aña escolar 2014/2015 no ta disponibel na momento di skirbi e articulo aki.



Clasificacion: Pa interpreta e resultado a haci uzo di un clasificacion di porcentahe cu ta wordo uza den enseñansa na Estados Unidos. E clasificacion ta di inaceptabel (0 pa 59), pober (60 pa 69), averahe (70 pa 79), bon (80 pa 89) pa excelente (90 pa 100).

Analisis: Scol EPB su clasificacion ta bon y cu tendencia positivo di bira excelente. Clasificacion di scol Tecnico anochi tambe ta bon, pero contrario na EPB, su tendencia ta di baha den clasificacion pa averahe. MAVO su clasificacion promedio ta uno inaceptabel (48%) cu diferencia grandi entre MAVO den dia (75%) y MAVO merdia (32%) y MAVO anochi (38%). MAVO den dia ta mustra un tendencia di baha den clasificacion di averahe pa pober. HAVO mescos cu MAVO su clasificacion promedio ta inaceptabel (56%) y tambe cu diferencia grandi entre HAVO den dia (68%) y HAVO anochi (43%). HAVO den dia su clasificacion pober ta uno preocupante. EPI como unico scol profesional intermedio su clasificacion pober di 65%, mescos cu HAVO, ta uno preocupante. Preocupante pasobra ambos tipo di enseñansa ta duna entrada na estudio superior. EPI ta mustra un tendencia cauteloso pa subi den clasificacion pa averahe. Contrario na HAVO, VWO si ta mustra un tendencia positivo pa subi den clasificacion di averahe pa bon.

Aruba: Clasificacion general di Aruba su enseñansa secundario ta consistentemente pober (63%) cu tendencia negativo pa bira inaceptabel. Den nos idioma crioyo nos ta bisa cu esaki ta malo mes.

Conclusion: (1) Ta conclui cu casi 80% (7 di 9) tipo di scol secundario NO por wordo categorisa como bon. (2) Solamente 60 di cada 100 (60%) alumno/studiante ta logra su examen cu exito. (3) Cada aña un porcentahe grandi di 40% NO ta logra pasa su examen cu exito. Pa aña escolar 2013/2014 esaki tabata un total di 730 alumno/studiante (40% di 1826 candidato total). (4) MAVO, merdia y anochi, y HAVO anochi ta hopi malo y ta direccion pa disaster. (5) MAVO den dia ta den un spiral negativo, caida di 15% (82% pa 67%) den apenas dos aña cu mester wordo frena inmediatamente.

Accion: Minster di Enseñansa mester tuma accion di biaha pa MAVO y HAVO. Haci un ‘quick-scan’ na MAVO y HAVO. A base di e informacion compila, haci algun intervencion efectivo pa sali for di e abismo pa loke ta trata resultado di examen, sigur pa loke ta trata MAVO merdia, MAVO anochi y HAVO anochi.

Inspeccion: Conseho ta pa laga Inspeccion di Enseñansa haci un investigacion di calidad profundo. Inspeccion ta traha cu diferente area di calidad. Asina lo haya sa cua area di calidad mester mas atencion.

Gobierno: Nos por constata cu enseñansa, no tabata, ni ta un prioridad pa Mike y AVP. Durante añanan di gobernacion, e resultado di scol a bay di ‘mal en peor’. Minister di Enseñansa, cu ta carga responsabilidad final pa enseñansa di Aruba, mester conclui, cu a base di e resultado malo presenta, e mester retira.

Hoben: Mi ta termina pa desea cada hoben cu ta den examen exito. Enfoca riba bo rosea, contesta e pregunta di facil pa dificil pa abo, y e dia prome cu examen bay lama of bay wak cine, en todo caso haci algo pa relaha bo mes. Persevera pa Bo Futuro, Traha Duro y Efectivo.

Expresionnan haci den e articulo aki no necesariamente ta refleha opinion di ArenaPoliti.co