Diabierna 13 Mei, pueblo por a mira un otro parti di e mini serie ‘CITGO-deal’. E tactica aki no solamente ta duna gobierno mas tempo pa desvia atencion, pero tambe un cabay di campaña perpetuo. Remarcabel tabata pa mira con tur partido den Staten, tabata core pa trata di haya reconocimento pa nan rol den e ‘CITGO-deal’. Esaki ta mustra claramente cu nos democracia a wordo reduci na presentacion di proyecto, un aña prome cu eleccion, pa tapa bagamunderianan di e añanan anterior. P’esey partido ABO lo kier haci e siguiente observacionnan critico.

1. Diabierna a wordo presenta un ‘Agreement’ pa sigui negocia pa yega na un ‘Final Agreement’. Pues ainda nada definitivo y ainda e gobierno di Venezuela tin cu duna su  aprobacion. Nos pais bisiña ta pasando den un crisis financiero, economico y politico hopi serio. Un dia despues di e anuncio aki, e presidente Venezolano a menasa di tuma varios empresanan priva over y encarcela e doñonan, si nan no coopera pa duna e estado mas divisa. PDVSA ta propiedad y e ta e proveedor principal di divisa pa e gobierno Venezolano. Na su turno PDVSA ta doño di CITGO. Pues si no tin suficiente divisa den e pais, con e ‘CITGO-deal’ aki ta wordo financia y con duradero e ta?
   
   
2. E ‘pitch’ of crudo hopi pisa cu tin premira pa procesa den e refineria na Aruba, ta wordo subsidia pa e gobierno Venezolano. Sin e subsidio aki, e procesamento di e material aki no ta economicamente factibel. Gobierno a haya garantia cu e subsidio aki lo sigui?
   
   
3. Aruba cu tambe ta bancarota y cu no por presta placa na un interes abou, lo bay haci un otro prestamo ‘off-books’ biyonario cu lo no cay bou di e supervision financiero di Staten, CAft y Hulanda, manera a sosode cu diferente PPP-proyectonan biyonario? Kico esaki lo nifica pa Aruba su debe biyonario y su ‘rating’ financiero global?
   
   
4. Uzando e forma di ‘off-books’ aki pa comprometi Aruba mas, gobierno no ta violando atrobe nos Constitucion y e Comptabiliteitsverordening door di firma contractnan biyonario sin aprobacion di Staten (pues pueblo) prome? Of manera nan tin e mayoria, y awor tambe e sosten di tur fraccion den Staten cu kier un pida di e supuesto cabay di campaña, e lo bira atrobe un acto unanime di legalisa infraccion di ley despues?
   
   
5. Den e ley di ‘Settlement Agreement’, tin poni cu e siguiente operador di e refineria tin cu paga minimal 27 miyon florin anual na impuesto. Awor cu gobierno a duna CITGO un deal pa solamente paga 10 miyon dollar (18 miyon florin), tur miembro di Staten a lubida kico tabata tin para den e ‘Settlement Agreement’ cu nan mes a haci un ley? Con gobierno por a duna CITGO un descuento di 9 miyon florin, pa despues bende pueblo esaki como un ‘salbacion’ y tur miembro di Staten a keda ‘muisstil’?
   
   
6. Gobierno ta calcula cu nan lo haya 22 miyon florin anual na impuesto. Honestamente, esaki lo yuda baha e debe biyonario? E 22 miyon florin aki cu gobierno lo haya, ta hustifica e inversion y riesgonan biyonario cu pueblo tin cu carga pa e ‘CITGO-deal’?
   
   
7. Den un declaracion haci pa e minister di Energia riba 26 April 2010, e ta declara cu e desmantelacion di e refineria lo costa minimal 300 miyon florin. Tambe den e  mesun ‘Settlement Agreement’, tin palabracionnan haci pa cu esaki? Kende lo ta esun responsabel pa esaki, momento cu e ‘CITGO-deal’ wordo firma?
   
   
8. Kende lo ta esun responsabel pa e daño ambiental cu a wordo haci durante añanan di operacion di refineria? Valero a wordo exonera miyones, sin aprobacion di Staten?
   
   
9. Uzando gas pa opera e boilernan, no ta haci un refineria ‘Green’. Ki tipo di gas lo wordo uza, ‘off-gas’ of ‘natural gas’? Ta wordo papia cu e gas aki lo wordo transporta via barco of un tuberia. Pues inversionnan biyonario. Kende lo paga pa esaki? E gastonan biyonario adicional aki pa opera e refineria supuestamente ‘Green’, lo no aumenta directamente e gastonan di operacion di e refineria cu lo haci’e menos competitivo?
   
   
10. E tipo di ‘pitch’ of crudo hopi pisa cu lo wordo procesa pa crea un ‘syncrude’, ta produci hopi polucion y daño ambiental. Ki tipo di medidanan of garantianan a wordo negocia pa percura cu e medio ambiente y e pueblo lo no wordo afecta mas?
    
    
11. CITGO of gobierno lo bay inverti den ‘Scrubbers’ pa preveni cu huma toxico y CO2 lo no contamina e medio ambiente atrobe y asina afecta e salud di e pueblo? Con e ‘CITGO-deal’ ta cuadra cu e acuerdo ambiental cu nos prome minister a firma na Nacionnan Uni?
    
    
12. E actual refineria lo wordo opera manera un ‘upgrader’. Pues no manera un refineria. Dicon gobierno por papia anto di crea entre 3000-5000 cuponan di trabou, mientras cu bou di operacion di Valero, ni un fraccion di e cantidad aki a wordo alcansa?  Cuanto di e cuponan aki lo ta pa Arubianonan cu ta sin trabou y cuanto lo ta pa extranjero? Kico lo ta e salario di e cuponan aki? Nan lo ta cuponan di ‘Cheap Labor’?
    
    
13. Riba 29 Januari 2016, un experto di gobierno, kier a bende pueblo cu CITGO lo kier un deal di 50 aña. Diabierna pasa, e minister a papia di 15 aña di operacion. Kico a conduci na e discrepancia grandi aki? Ta puro manipulacion tabata tin na januari?
    
    
14. Cuanto ‘finder’s fee’ ta bay wordo paga y na kende cu e ‘CITGO-deal’?
    
    
15. Dicon un show ta wordo organisa na Mei y hasta bendi cu e refineria lo wordo habri na Augustus, mientras e minister di Energia a enfatisa cu e operacion lo cuminsa aki 2 kisas 3 aña? Algo similar a wordo haci na 2009 y 2013 pa gana eleccion. Na 2009 gobierno a bin cu e asunto di e ‘PEMEX-deal’. Na 2013 e tabata ‘PETROBRAS, PETROCHINA, Pacific Rubiales, PETROTRINIDAD  y hasta tambe un PDVSA-deal’. Na final e refineria a cera, pero eleccion a wordo gana caba y atrobe. Pues con serio e ‘CITGO-deal’ ta na 2016?
    
    

Pues teniendo cuenta cu e poco observacionnan menciona, partido ABO ta bolbe exigi pa gobierno mustra pueblo e supuesto ‘CITGO-deal’, prome cu firma cualkier contract pa mara pueblo atrobe na un acuerdo miyonario y controversial, cu no ta na bienestar di e pueblo. Partido ABO tambe lo kier mira un diversificacion di nos economia, unda cuponan di trabou duradero, bon paga y pa nos pueblo, ta wordo crea. Nos no kier cuponan temporal, mal paga y sigur no a costo di tur cos y cu no ta na beneficio di Aruba y su pueblo. Pueblo a wak e mesun triki politico aki wordo uza den pasado. A bira tempo pa politiconan tuma pueblo y su interes na serio, enbes di cada biaha tuma pueblo haci chambon (lolo)!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co