Recientemente Parlamentario señor Guillfred Besaril a tuma nota di declaracion di varios organisacion den nos comunidad manera entre otro Rode Kruis, Aruba Lions y Fundacion pa Nos Comunidad, kendenan ta organisacionnan cu trata hopi di cerca cu e tema pobresa riba nos Isla. Cada un di e organisacionnan aki a trece pa dilanti cu probresa ta latente den nos comunidad y cu e problema no ta wordo atendi cun’e manera debe ser. Tur esaki den opinion di fraccion di MEP, ta danki na e falta di liderazgo na Aruba.

"Un di e indicadornan importante di pobresa ta criminalidad. E negligencia y falta di liderazgo di e gobierno actual a haci di crimiminalidad un industria riba su mes. Aruba ta desde aña 2014 den un "high season" constante di criminalidad. De facto Aruba ta e unico pais na mundo caminda cu e high season aki ta dura henter aña! Na final di aña 2015 fraccion di MEP den Parlamento a entrega un mocion di desconfiansa contra e minister actual di Husticia y alavez a urgi e lider di gobierno pa tuma accion y pone nos comunidad su siguridad den man di un otro persona. Na januari 2016, den pleno comienso di aña, nos fraccion a bolbe haci un yamada n'e Prome Minister di nos Pais p'e tuma accion concreto pa loke ta e cartera di Husticia, pero pa un segundo bes e lider a opta pa neglisha e yamada di nos fraccion ignorando no solamente Pueblo su preocupacion pero tur señal di deterioro!

Camara di Comercio y otro partnernan den comercio a suplica gobierno na mas cu un ocasion pa tuma accion concreto pa stimula economia, ya cu esaki ta bayendo den un direccion sumamente preocupante. Den e aña aki caba ya tin un cantidad di tienda den entre otro caya principal y besindario cu a cera nan porta. Otro indicador tabata e rapport di Banco Central di Aruba, caminda ta ser indica cu e crecemento economico di nos isla tabata minimo.

Di un banda ta obvio cu e aumento di e fenomeno pobresa na Aruba ta danki na e prioridadnan robez di un gobierno cu a desconecta totalmente di Pueblo. Di otro banda e tin su origen den e falta di liderazgo cu nos Pais ta conociendo e ultimo añanan. Ora cu no tin un lider cu ta pone atencion na e desaroyo den su mesun Pais, cu ta opta na pasa mas tempo den avion y den exterior cu na cas, nos ta haya nos mes cu situacionnan fastioso manera esunnan cu nos Pais ta hinca den dje awor. Un isla caminda mas y mas pobresa y deterioro social ta lantando cabes cu consecuencianan desagradabel riba tur tur tereno!"

Expresionnan haci den e articulo aki no necesariamente ta refleha opinion di ArenaPoliti.co