Edgard Vrolijk (MEP): Un vision Green cu a produci net nada na desaroyo economico sostenibel di nos pais

Publica: Diahuebs, 16 juni 2016 | Autor: Redaccion

20 di juni awo ta haci exactamente 4 aña cu durante e conferencia di RIO+20 (20 juni 2012), gobierno Eman 1 a anuncia cu pa no mas tarda 2020 Aruba lo ta 100% sostenibel. Cu esaki gobierno a desaroya un plan ambicioso pa suministro di energia na Aruba sostenibel y pa desacopla produccion di coriente di e prijs halto di combustible door di traha un di dos parke di Molina di biento (2014), un Proyecto Waste to Energy (2014) y un Proyecto di refrigeracion pa medio di awa di lama (2015). Y cu yegada di TNO y organisacion di Green Aruba International Conference como Europa meets the Americas lo haci Aruba su nomber conoci den Europa y Latino America di ta un isla berde y cu un investigacion di Ernst & Young a mustra cu den economianan cu ta creciendo rapidamente den Latino America, tin interesnan enorme pa soluccion sostenibel pa procesonan di construccion, mineria, construccion di caretera, agricultura, puertonan maritimo como aereo y expansion di sector turistico. Y unda Aruba kier ta parti di e pilar economico nobo, bira e show case pa sostenibilidad den region y crea 1800 empleo nobo pa e periodo te 2020 den e pilar nobo aki.

Ora bo lesa e bunita frasenan aki di plan di partido AVP yama “Progreso y Bienestar pa Un y tur 2013-2017”, hopi na aña 2012-2013 lo a ser yena cu optimismo y speransa cu enberdad nos economia cu e pilar economico nobo priminti aki, lo pa 2017 ya Aruba lo sinti prosperidad. Enbes cu e pueblo aki sinti e efecto di un economia cu ya mester ta recupera, nos ta wak un Caya Betico Croes cu casi tur tienda ta cera, desempleo creciente, poder di compra a bay atras y pobresa extremo azotando nos pais. Ora bo lesa e bunita frasenan aki e ta crea preguntanan cu bo ta spera pueblo tambe por haci y cuminsa realisa cu nan a ser engaña y manipula y cu mayoria di locual a ser hinca den programa di partido AVP tabata solamente plannan ambicioso pero cu hopi consecuencia pa cada un di nos:

Cuanto porciento na energia sostenibel a ser logra den 4 aña? Y nos lo alcansa e 100% na 2020 y cuanto pueblo lo mester sacrifica e siguiente 4 añanan pa logra esaki?
Cuanto placa a ser hinca den e conferencianan ariba menciona?
Cuanto empresa nobo a establece nan mes na Aruba? Y cuanto entrada nos tin na esakinan?
Cuanto cupo di trabao esaki a crea? El a bira un pilar economico riba su mes? Cuanto % di nos GDP?
Cuanto placa a costa e Proyecto Waste to Energy, ken a hinca e placa aki y cuanto % di energia sostenibel e ta produciendo?
Y dicon ainda nos no tin solucion pa Dump di Parkietenbos si ta papia di Vision Green?
Prijs di petroleo a conoce un bahada enorme pero pueblo a sinti efectonan minimo di esaki, ki ta e motibo pa Hedge si tabatin plannan ambicioso pa esaki?
Si nos pilar economico nobo aki (Green Gateway) ta proyecta pa crea 1800 cupo di trabao anto ki ta e motibo pa un ansha di morto pa reapertura di nos refineria cu ta contrario na e vision Green di gobierno?

Ora bo analisa e bunita frasenan aki bo por conclui cu e gobierno aki a duna pueblo promesanan falso cu awe un vision Green cu a causa cu nos a conoce un Mega Debe, nos a haya un KB, nos a haya un instituto financiero CFT pa controla finansas di nos pais, aumento di criminalidad, aumento di pobresa, problemanan social enorme y cortamento den aspectonan social importante den nos pais manera nos muchanan y hopi mas. Nos por wak cu nos Prome Minister a yena pueblo na 2012 cu speransa, pero cu awe hopi parti pueblo ta wak cu tur locual a ser priminti tabata un plan hopi ambicioso pero cu na final di dia ta pueblo ta paga pa esaki y mientras cu su persona ta keiro rond ta haci su trabao di makelaar pa Hulanda mientras su pais ta den decadencia. Mi ta spera cu e reapertura di e refineria cu nos partido MEP si a bay campaña 2013 cun’e den pueblo por percura pa e 1800 cuponan di trabao cu nunca a bin di e Green Gateway y asina nos pueblo por tin e speransa di por recobra su prosperidad cu no a bin na man di e vision Berde tanto prometi door di e partido berde AVP.

Expresionnan haci den e articulo aki no necesariamente ta refleha opinion di ArenaPoliti.co

Edgard Vrolijk (MEP): Un vision Green cu a produci net nada na desaroyo economico sostenibel di nos pais

Articulo similar

7 motibo pa laga Pueblo eligi su Gabinete

Inscribi pa ricibi un resumen semanal di e articulonan mas impactante.

Contacto

Inscribi pa ricibi un resumen semanal di e articulonan mas impactante.