ORANJESTAD – Durante introduccion di e monitor den tempo real di Aruba su convergencia pa energia renobabel, Minister President Mike Eman a anuncia cua ta e scolnan cu ta drenta e mundo di energia sostenibel, cu instalacion di solar panel riba nan infrastructura. Despues cu Scol Primario Kudawecha a keda cla y ta contribuyendo caba na e produccion nacional di energia limpi, awo ta toca turno na Abraham de Veer School na San Nicolas.

E proyecto ta haci uzo di e temporada di vakantie grandi pa asina realisa tur e trabounan necesario. Tras di e scol secundario pariba di brug tin un lista cu ta completa e 16 scol y edificio di Gobierno cu ta forma parti di e iniciativa aki di Gabinete Mike Eman II na caminda pa un isla 100% sostenibel na aña 2020.

E Monitor Den Temporal Real di Energia Renobabel ta un iniciativa di WEB Aruba N.V. hunto cu Elmar N.V., Utilities N.V. y sosten di Gobierno cu e obhetivo pa comparti e informacion aki cu e comunidad local y internacional. Asina ta yuda compronde miho e variantenan den e produccion di energia pa medio di solo, biento y pronto tambe biogas.

Filomena College, Scol Preparatorio y Basico Conrado Coronel y Scol Basico Mon Plaisir ta siguiente riba e lista despues di Abraham de Veer School. Su tras ta bin Graf von Zinzendorf na San Nicolas, Emmaschool na Ayo, Colegio Santa Filomena na Weg Seroe Preto y Agnes Kleuterschool na Noord. Manera por ripara, e scolnan selecta pa haya e panelnan solar y aporta na e red di produccion, ta cubri e teritorio nacional.

Tambe ta riba e lista Colegio San Antonio na Santa Cruz, St. Anna School,  Prinses Amalia Basisschool, Colegio Santa Teresita, Colegio San Augustin y, por ultimo, edificio di Biblioteca Nacional Aruba na Oranjestad. E momento cu ta bay instala e infrastructura solar di cada scol ta depende di e schedule di cada scol, pero e trabounan ta bay extende cuminsando den e periodo entre 2016 te den 2017.

Hunto cu otro proyectonan existente manera Parke di Molina di Biento, e scolnan ta percura 2.6 pa Mega Watt di energia solar cu na 2018 ta completa e 40% di e penetracion di Energia Renobabel den nos produccion nacional, bahando e dependencia di combustibel tradicional.

E proyecto ta un iniciativa di Gabinete Mike Eman como parti di e vision di un Aruba energeticamente sostenibel na 2020, y e ta un proyecto cu WEB Aruba NV ta desaroya, maneha y financia. Partnernan den e proyecto ta Ministerio di Asuntonan General, Utilities Aruba N.V., T.N.O., Rocky Mountain Institute, Carbon War Room, Ministerio di Enseñansa, Departamento di Enseñansa, D.O.W., ELMAR N.V. y D.T.I.

Expresionnan haci den e articulo aki no necesariamente ta refleha opinion di ArenaPoliti.co