Minister de Meza orguyoso. 
Mirando e retonan energetico cu tin mundialmente, e direccion sostenibel di Aruba ta esun responsabel. 

ORANJESTAD – WEB Aruba NV a tuma otro paso pa yega na meta di Aruba pa na 2020 Aruba por ta independiente di ‘Heavy Fuel Oil’ pa por genera energia. Pa Minister di Energia Mike de Meza esaki ta un orguyo grandi. Mas ainda mirando cu mayoria di e trabou ta wordo realisa door di empleadonan di e companianan envolvi, yiunan di tera. E ceremonia di diabierna ultimo tabata groundbreaking di e parke di Flywheel, cu ta almacena energia renobabel pa percura pa un balansa den e sistema di coriente riba nos isla.

E proyecto di almacenage energetico ta un parke di un total di 20 “Flywheel” cu un capacidad total di 5 MW. E proyecto ta forma parti di e plataforma di WEB pa integra energia sostenibel (ARIP), cu na su turno ta parti di Aruba su “Aruba Renewable Energy Strategy” (ARES). Esaki ta un paso mas pa logra e vision di WEB NV di ta mas berde, mas limpi y liber di combustibel tradicional na 2020.

Minister Mike de Meza a cataloga e dia como uno hopi importante unda cu a logra inicio di otro “milestone” pa cual e ta felicita WEB, ACE Engineering, ELMAR, ALBO y Temporal Power Ltd., e ultimo ta e empresa cu lo produci e flyweelnan. E trabou di e empleadonan di WEB NV ta masha importante ya cu pueblo ta depende di nan, el a bisa. “Mirando e retonan cu tabatin mundialmente pa cu energia, e direccion aki ta uno responsabel. Nos sa tambe cu e direccion aki no por a wordo tuma si no tabatin e trahadonan capacita di WEB y ELMAR trahando conhuntamente cu Gobierno pa bay e direccion aki. Ta hopi positivo pa mira e dedicacion di e trahadonan di WEB cu ta lidera tur e proyectonan aki, hunto cu e empleadonan di ELMAR y Utilities.” Pero mas importante ta ora mira tur e proyectonan aki, ta cu mayoria di esnan envolvi ta personanan local, cu ta algo cu ta pone mi sinti un orguyo grandi, esta cu “nos yiunan di tera ta riba e nivel halto aki”.

Flywheel ta un bateria mecanico cu ta almacena energia den un wiel masivo. E masa y rapidez di e obheto ta determina e cantidad di energia cinetico. Ora di carga e flywheel, ta uza energia di e red di WEB pa genera pa un motor cu ta acelera e flywheel pa un speed halto. Ora di descarga, e flywheel ta baha speed, uzando e situacion di e wiel pa core e motor den “reverse” p’asina e funciona manera un generator. E flywheel lo carga durante e momentonan cu tin menos demanda di coriente na Aruba y descarga durante e momentonan cu e demanda ta mas halto. Ta trata di un proyecto cu lo costa 17 miyon florin cu ta wordo financia door di un consorcio di 9 instituto financiero. Aruba Investment Bank  (AIB) ta e instituto cu a percura pa e financiamento aki.

Den cuadro di inicio di e proyecto aki WEB Aruba NV, Temporal Power Ltd., Financiadonan, hunto cu ALBO Aruba y ACE Engineering a haci entrega di un check na Aruba Animal Shelter, Stichting Schouwburg Aruba (Cas di Cultura) y EPI sector Ciencia y Tecnologia. Hunto cu proyectonan Parke Molina di Biento, Parkenan Solar, panelnan solar riba daknan di edificonan di gobierno y scol, Gobierno di Aruba kier yega na e meta di produci energia totalmente sostenibel pa 2020. Esaki ta logra cu cooperacion di empresanan gubernamental y sector priva. Esaki ta e meta cu a wordo poni for di inicio di gobernacion di Gabinete Mike Eman na 2009. 

Expresionnan haci den e articulo aki no necesariamente ta refleha opinion di ArenaPoliti.co