Prome Minister Eman na groundbreaking di parke di ‘Flywheel’ na WEB Aruba NV.  

ORANJESTAD – Gabinete Mike Eman ta sigui cu su vision pa pone Aruba riba mapa mundial como e prome pais den region cu ta energeticamente sostenibel. Esaki Gobierno ta haci den cooperacion cu su companianan di utilidad. Diabierna ultimo tabatin un ceremonia pa inicio di e parke di ‘Flywheel’, un sistema di almacenahe di energia. “Sinti boso orguyoso di loke Aruba ta logrando,” Prome Minister Mike Eman a bisa den su discurso e atardi aki dilanti un grupo grandi di trahadonan di WEB NV, ELMAR NV y otro invitadonan.

E ceremonia di diabierna ultimo na WEB NV tabata groundbreaking, unda lo instala e ‘Flywheel’, cu ta un sistema moderno di warda energia. E ta un tecnica cu ta stabilisa e fluctuacion di fuentenan energetico y cu ta trece mas eficiencia den e operacion general di WEB. E proyecto di almacena energia ta un park di 20 ‘Flywheel’ cu un capacidad total di 5 MW cu lo yuda WEB y sigur Aruba yega mas cerca di e meta poni pa na 2020 ta 100% sostenibel. Segun planning, e proyecto mester ta den operacion pa e ultimo kwartaal di 2017. E ‘flyweel’ ta wordo construi door di Temporal Power Ltd. y instala door di companianan local bou supervision di personal di WEB.

“Awe nos curason ta bati cu orguyo pa mira con nos compania local ta sigui lidera den region y mundo. Kisas ta dificil pa kere cu un isla chikito manera Aruba ta canando dilanti riba tereno di sostenibilidad. Pero e ta un hecho, pasobra no tin ningun pais, sigur no den e region aki, cu ta atendiendo cu e tema di introduccion di energia sostenibel na e forma integra manera Aruba ta haciendo. Nos no unicamente ta expandiendo nos capacidad di energia sostenibel, pero loke ta haci nos mas excepcional ta e vision pa mira cu bo tin cu cana dilanti di e retonan cu ta bin na momento cu bo ta expandiendo e capacidad di energia renobabel,” Prome Minister Eman a bisa. El a splica cu hopi pais a cera e capitulo di energia renobabel ora cu nan a wordo confronta cu e diferente retonan cu tur estudionan ta bisa. Entre otro e fluctuacion riba grid ta motibo cu hopi compania di utilidad a dicidi di stop cu nan plannan. Sinembargo Aruba a pone como meta y ta atendiendo paso a paso cu tur e retonan cu esaki ta trece cune. “Pesey un palabra di felicitacion na empleadonan di WEB, ELMAR, Utilities y tur e companianan cu ta yuda Gobierno y pais Aruba carga e vision grandi aki. Empleadonan danki, boso ta hacimi orguyoso,” e mandatario a bisa.

Prome Minister Eman a expresa algun palabra na Ingles na e invitadonan di exterior bisando cu Aruba ta hopi orguyoso cu algun aña pasa Aruba a wordo adopta door di algun instituto y NGO-nan mas grandi y famoso di mundo, manera Carbon War Room y Rocky Mountain Institute, cu a tende di su meta ambicioso y a dicidi di traha hunto cu e pais aki. El a splica cu e motibo cu institutonan manera esnan menciona a scoge pa traha cu Aruba ta pasobra “the island has the skills and the will to do this”. Esaki ta algo cu nos tur mester ta orguyoso di dje di ta lidera e vision di sostenibilidad, un expresion di un instituto grandi di mundo cu ta custumbra di traha cu paisnan grandi di mundo.

Prome Minister Eman a papia tambe di e motibo tras di e vision di un maneho sostenibel. “Nos kier pa nos yiunan y e siguiente generacionnan di tin e aire mas limpi na mundo pa hala rosea, di tin un medio ambiente mas limpi, pero tambe cumpli cu nos responsabilidad pa mustra cu si esaki por wordo logra na Aruba un isla chikito, otronan grandi tambe por realisa esaki. Aunke chikito nos por contribui grandemente na cambia e rumbo di mundo. E ta un responsabilidad cu mundo y humanidad. Sinti boso orguyoso di tur loke Aruba ta haciendo. Laga nos sigui riba e caminda aki pa sigura cu soñonan grandi por wordo realisa cu un determinacion grandi.” 

Expresionnan haci den e articulo aki no necesariamente ta refleha opinion di ArenaPoliti.co