STA CRUZ -- Lider di MEP Evelyn Wever-Croes a reacciona riba e cambio di ley di Codigo Civil cu tin awor na Parlamento. 

"Tur hende ta papia di e amienda di Desiree, pero ningun hende ta papiando di e intencionnan serio y grave di Gobierno di Mike Eman pa trese cambionan den nos Codigo Civil cu ta distorciona e instituto di famia. 

Mi ta referi especificamente na e cambio di fam cu gabinete Mike Eman a manda Parlamento. Ta riba e ley aki sra Desiree Croes kier introdusi un amienda. 
Pero e cambio riba su mes ta un cambio hopi fundamental. 

Actualmente nos leynan ta stipula cu e yiu ta carga fam di e tata y si e tata no reconose e yiu, e ta carga e fam di e mama.
Awor Gobierno kier cambie y den e cambio bo ta nota un falta di seriedad pa e instituto di famia pa loke ta e fam.
Den e cambio proponi mayornan por bai scohe e fam di e mama of di e tata, of un combinacion di ambos.
Pero e cambio ta bai mas leew ainda pasobra por scohe tambe e fam di e suegranan.
Por yega hasta na 4 diferente fam pa e yiunan!
Esaki ta un cambio cu ta bai demasiado leew segun opinion di hopi hende, y mas ainda, sin cu ta necesario.
Un cambio den ley mester bin ora cu a señala un problema, y kier soluciona e problema aki cu un cambio di ley. Pero no a wordo hasi ningun investigacion cu ta necesario pa bai trek lot, y scohe famnan cu no ta relaciona cu e yiu completamente.
Cu e cambio aki yuinan por haya fam cu no ta ni di e mama, ni di e tata, pero di e wela. Esaki ta destabilisa nos instituto di famia, e ta hasi e fundeshi mas swak, pasobra segun expertonan na Aruba e "fam" di un mucha ta algo hopi importante.

Si e ley aki pasa dia 22 di augustus manera cu AVP kier, mayornan cu yiunan menor di edad tambe por cambia fam di nan yiunan. Pues e ley no ta solamente aplicable riba muchanan cu nace despues di e ley.

Pesey mi ta puntra mi mes, dicon Mike Eman ta hasi wega cu algo asina? Dicon e kier cambia e forma cu nos ta duna fam na nos yuinan, di e forma aki?
Mi ta puntra mi mes tambe dicon ni Mike Eman, ni ningun otro miembro di su gabinete of departamento di gobierno no ta dunando informacion riba e cambio fundamental aki? Dicon nan kier bin cu e cambionan aki manera ladron di anochi? Y sin hasi estudio na su consequencianan!

Mi ta lamenta e falta di curashi cu Mike Eman tin di enfrenta nos pueblo cu algo asina fundamental, e falta di transparencia cu cual e ta goberna. Pesey mi ta trese e punto aki padilanti. Nos lo sigi reuni cu expertonan riba e punto aki, pa nos sa con comunidad ta para pa cu e cambio aki.

OTRO PRIORIDAD
Loke si mi ta lamenta ta cu Gobierno di Mike Eman no ta duna prioridad na cosnan cu realmente ta di importancia den nos comunidad. Por ehempel, bin cu leynan pa proteha nos muchanan di abuso sexual y bin cu castigonan mas severo contr abuso sexual di muchanan. Ami ta di opinion cu gobierno mester pasa e leynan contra abuso sexual di muchanan PROME cu bin torno na fundeshi di nos famianan", segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co