......de un futuro sercano. 

Si no bini cambio den e forma cu hende ta anda cu medioambiente y si no bini cambio drastico den politica socio-economico di majoria di pais na mundo, tin tur indicacion cu escacez di cuminda, escacez di energia, escacez di tera pa agricultura, desigualdad economico, social y e inseguridad cue ta genera, lo domina bida na mundo. Un mundo instabiel yena cu inhusticia. Ta solamente paisnan cu ya caba ta actua cu diligencia riba cada un di e terenonan aki den un forma integral, y progresivo, lo conoce stabilidad y husticia y progreso. Esaki ta en corto loke scientificonan ta anticipa pa futuro decananan pa mundo. E no ta un prediccion di desaster. Al contrario. E ta un yamada urgente pa cambio! Cambio den e forma di genera energia cu ta necesario pa tur cos cu nos haci y produci. Cambio den e desiguladad creciente rond di mundo, cu na su turno ta crea asina hopi frustracion, confrontacion y violencia. Resistencia contra e yamada urgente pa cambio aki, ta nifica cu lo sigui accepta, tolera y empeora e desigualdad den entrada, acceso na enseñansa di tur nivel, acceso na cuido medico, acceso na vivienda, oportunidad pa trabou cu un bon salario, acceso na trankilidad y seguridad, na un miho calidad di bida. Resistencia contra cambio of djis haci cambionan parcial y cosmetico, lo no elimina e problemanan y nan consecuencianan grave. Resisti pa mas uzo di energia alternativo por ehempel, lo nifica cu e consecuencianan di un clima cada dia mas agresivo y inpredicibel, lo bira un menasa pa nos existencia awor aki. Sigur pa nos cu ta biba riba un isla chikito.

SOSTENEBILIDAD
Pa nos comunidad por sigui existi y desaroya den direccion di mas stabilidad y uno mas husto, nos mester haya formanan di organisa nos comunidad cu ta duna oportunidad igual na tur. E causa di hopi di e problemanan economico, y socio-economico, ta debi na sistemanan di desigualdad y mal uzo di recursonan di pasado. Pesey awor nos mester sigui cambia den forma structural y haci'e den forma desicivo. Lamentabel ta cu partidonan di oposicion na Aruba, MEP y PDR, ta resisti e cambionan fundamental cu nos mester haci. MEP y PDR ta contra di e expansion di e forma cu nos ta genera energia. Nan ta bisa cu nan kier mas uzo di energia renovabel (= solo, awa, biento, entre otro), pero ta sigui resisti expansion di mulinanan di biento cu den un tiro lo aumenta e energia renovabel na Aruba cu 18 pa 24%. MEP y PDR ta contra pa sigura cu henter nos comunidad ta sigui participa y saca beneficio di turismo. MEP ta sigui contra di e acuerdonan internacional pa cuida islanan manera Aruba di e desaster cu cambio di clima lo causa. MEP y PDR ta cuestiona e mero concepto di sostenebilidad y MEP a hasta cualifica esaki como comunismo. E inversionnan cu gobierno di AVP a haci den infrastructura pa renova nos apacidad economico y social a wordo critica door di MEP y PDR. E inversionnan den forsa di compra di miles di trahado y pensionadonan a wordo critica door di MEP y PDR. MEP a hasta cualifica esaki como malgasta,ento di placa. Kier men cu no por conta cu partidonan di oposicion pa trece e tipo di cambio cu mester pa sigura nos comunidad di Aruba, e stabilidad y husticia cu nos kier. E politica oportunista di bula manera biento ta supla, of e cambionan cosmetico cu nan sa propone, no ta loke pueblo di Aruba merece. Specialmente hobennan cu ta busca un futuro mas stabiel y cu ma oportunidad, no por conta riba MEP y PDR. De lo contrario, e maneho di reforma y renobacion cu AVP a hiba riba hopi tereno, ta e maneho cu mester pa futuro. Pasobra e ta e maneho cu ta sigura mas stabilidad y mas husticia social den futuro.

Expresionnan haci den e articulo aki no necesariamente ta refleha opinion di ArenaPoliti.co