No ta di awor sino for di luna di januari 2016 Otmar Oduber a cuestiona e maneho descabeya di minister di infrastructura Benny Sevinger abiertamente. Dia cu minister di turismo a presenta serca gobernador di Aruba pa entrega su supuesto retiro e la bisa cu un di e motibonan pakiko e ta bai entrega su retiro entrante 1 maart 2016 ta e free for all cu tin di proyectonan cu Benny Sevinger ta aproba sin consulta cu minister di turismo.
Manera ya ta conoci, Otmar Oduber a ganja muri y e mester a guli su palabranan pasobra e NO a entrega su retiro. Al contrario e la keda como minister y mas tristo di henter e situacion ta e hecho cu desde 1 maart 2016 e situacion den gobierno a bira hopi mas peor. Segun Otmar Oduber e la reuni cu su gobierno a nan a yega na un palabracion cu tur peticion pa desaroyonan di sea hotel of condominium mester haya su aprobacion tambe. E la bisa cu den e condicionan pa desaroya proyecto, gobierno a pone un clausula cu e minister di turismo tambe mester aproba e proyecto. Minister di turismo ta bisa cu su maneho ta dirigi riba expansion di camber di hotel manera boutique hotels y no condominium. Esaki ta zona un tiki stranjo si y hopi contradictorio mirando e hecho cu ta e propio minister di turismi Otmar Oduber a presenta e proyecto di airport hotel cu sigur no por wordo categorisa como boutique hotels. No solamente esaki sino ta e propio minister di turismo den e ley di regulacion di hotelnan all inclusive kier sigui yena nos pais cu cambernan all inclusive. En todo caso, remarcabel ta hecho cu na e momentonan aki tin un discusion riba 2 proyecto di condomium. Benny Sevinger a declara den corte cu e grupo di inversionista cu kier desaroya un condominium no mester preocupa pasobra e ta den proceso pa adapta y cambia e ROP (ruimtelijke ontwikkelingsplan) y una vez esaki keda cambia e grupo lo haya e tereno cu ta den discusion. Di otro banda Otmar Oduber cu tambe ta forma parti di gabinete Mike Eman 2 a bisa cu e no a lesa loke Sevinger a declara y e no por imagina cu Sevinger lo a bisa algo asina pasobra Sevinger ta bion na altura di kiko maneho di gobierno ta referente condominiums y hotels. Oduber a bisa cu bao ningun circumstancia lo bai di acuerdo pa bin cu mas condominium.
Mas aleu Otmar Oduber a bisa cu gobierno tin eenheid van beleid y cu TUR minister mester sigui e linja di maneho di gobierno. Otmar Oduber a cuestiona publicamente e declaracion di su colega Sevinger y a bisa cu Sevinger lo ta actuando empugna di e manheo di gobierno. Un biaha mas a wordo demostra cu tin 9 gobierno den 1 gobierno y tur minister ta riba nan mes y cada un di nan ta sirbi nan propio interes y no interes general di e pueblo aki.
Cu e decision y delcaracion di Benny Sevinger ta keda demostra cu e ta haci loke e kier y e convenio cu nan a sera cu Otmar Oduber no tin ningun validez. Si nan mes cu ta colega di otro ta trata otro asina aki, ta kiko e pueblo por spera di e hendenan aki! Mas dia e gobierno aki keda, mas danjo e ta haci na nos pais! Di un banda un minister ta bisa e kier cuida naturaleza y di otro banda e otro minister ta roza tur tereno cu e haya pa roza!

Expresionnan haci den e articulo aki no necesariamente ta refleha opinion di ArenaPoliti.co