Cambio di fam ta mas importante cu castigo contra abusador sexual? 

ORANJESTAD -- Lider di MEP Evelyn Wever-Croes tin algun dia ta elaborando riba cambionan cu Gabinete Mike Eman a manda Parlamento pa cambia e Codigo Civil. E reunion aki a wordo yama pa dia 22 di augustus y ta den e reunion aki sra Desiree Croes lo entrega su amienda. 

"Pero los di e amienda ey, ta importante pa enfoca riba e ley mes cu Mike Eman a manda Parlamento. Ta trata di un documento di casi 240 pagina na cambio den e Codigo Civil. Cambionan entre otro riba tereno di fam, di paternidad, di herencia. Mi ta lamenta cu gabinete Mike Eman mes no ta dunando tur e informacion necesario na comunidad di e cambionan aki cu lo afecta e fundeshi di nos comunidad: e famia. Pesey nos di MEP si ta carga nos responsabilidad pa trese esakinan na conosemento di pueblo kiko e cambionan aki ta. 

Con e ley tocante FAM ta awor?
Actualmente e mucha ta carga fam di e tata, y si e tata no reconose, e fam di e mama. 

Con e ta bai bira?
Mayornan ta bai haya e escohencia entre un variedad di fam: esun di e mama of e tata mes, por ehempel den mi caso Croes (mi fam) of Wever (di mi casa) of Wever Croes of Croes Wever. Esaki ta pa elimina discriminacion cu e hende muher por sinti pasobra e mes no por duna su yiu su fam. Esaki ta basa riba hurisprudencia y leynan den demas paisnan den Reino. 

Pero Gabinete Mike Eman ta bai mas leew: bo por scohe tambe fam di e abuelanan di e Mucha. Den mi caso pues aparte di Croes of Wever of Wever Croes of Croes Wever, tambe Garrido (fam di mi Mama) of Da Silva de Freitas (fam di mi suegra den felis memoria) of un combinacion di esakinan. Cu esaki e cantidad di opcion ta bira hopi grandi.  Por cierto, e paso aki ta bai mas leew cu demas paisnan den Reino, y tampoco ta basa riba hurisprudencia local. Apesar cu nos a hasi pregunta, gobierno no a splica DICON mester bai asina leew tampoco. 
Debi cu tin asina tanto opcion ta bai bira posibel, mester tambe di leynan pa ora mayornan no por yega na un acuerdo riba e fam, cu hues por dicidi. 

Nucleo familiar ta wordo debilita
Expertonan riba e tereno aki ta preocupa cu e cambiamento di fam por debilita e nucleo familiar. Pasobra por pasa cu e mucha ta haya un fam diferente na esun su mama y esun di su tata. Esaki - segun expertonan - ta afecta e lasonan familiar. Ademas, na Aruba e FAM di yiunan ta algo hopi importante. Ningun hende a pidi pa hasi wega cune!

Prioridadnan den nos comunidad
Despues di a consulta cu hopi hende riba e tema aki mi por constata cu tin un consensus cu tin otro temanan na Aruba cu mester tin mas prioridad. Un tema cu nos comunidad ta sinti cu mester haya mas prioridad ta e tema di abuso sexual contra muchanan. Ainda nos no tin lo basico pa combati e acto cruel aki y ni gobierno ni e mayoria den Parlamento cu ta defende gobierno, ta mustra interes den e tema aki. Nos tin 7 anja ta blo papia so, pero nada di accion. Nos proposicion pa bin cu castigonan mas severo y amplia e 'verjaringstermijn' ainda ta abou den un lachi wardando riba gobierno pa duna su opinion riba dje. Na e momentonan aki y den nomber di un grupo grandi den nos comunidad nos ta manda e señal pa Gobierno, ban pone prioridad PROME na protehe nos muchanan di abuso sexual. E cambiamento di FAM por warda un rato", segun lider di MEP Evelyn Wever-Croes. 

#EvelynMEP

Expresionnan haci den e articulo aki no necesariamente ta refleha opinion di ArenaPoliti.co