Den rueda di prensa semanal di Partido Democracia Real, su lider, parlamentario Andin Bikker a  cuestiona e aumento barbaro di grondbelasting pa 2016. 

E fraccion a bin constata cu hopi ciudadano a haya aumento den nan grondbelasting di 2016, caminda cu gobierno a balora e propiedadnan barbaramente halto.

Bikker a detaya con grondbelastig ta hinca den otro. El a splica cu e temponan aya tabata tin casnan humilde balora te cu 60 mil florin y nan tabata tin beslagvrije voet, kiermen cu no tabata paga nada na impuesto te cu 60 mil florin. 

Riba esey 60 mil florin, kitando e suma aki, e porcentahe di grondbelasting tabata wordo calcula riba esey. 

“Kico a pasa awor? Cu pa 2016, sorpresivamente, Gobierno a cuminza balora casnan na sumanan cu den e mercado bo no ta yega na nan y hopi hende a bin  Parlamento pa reclama esaki. 

Esaki ta encera cu gobierno, kizas deliberadamente a aumenta e belasting pasobra e parti di 60 mil cu e propietario no ta paga belasting riba dje, awor diripiente a bira algo cu no ta relevante mas”, Bikker a bisa y splica cu tin diferente tipo di waarde.

E ta haya cu esaki no por, pasobra e temponan aya Gobierno ta balora semper ora bo bay notario a base di e leggerwaarde, cu ta e balor cu tabata abao di e suma riba cual ta paga belasting. Bikker a splica cu esaki pa en caso cu un dia algo pasa cu bo cas y mester construi e completamente di nobo. 

Pero tambe tin e excecutiewaarde unda cu si un dia e persona no ta paga su hipoteca nan por hibe vindishi, y ademas tin waarde-economische verkeer, kiermen e balor cu ora un cas wordo poni na benta riba e mercado, semper e ta un tiki halto, pero a base di negociacionnan por yega na un prijs cu ta esun di mercado liber.

Pero awor aki gobierno, den hopi caso cu mi a wak, a sinta riba e balor mes cu si bo pone bo cas na benta. Esaki ta basicamente un medida riba pueblo, anto un medida scondi, pasobra hopi hende ta haya nan aanslag cu dos luna pa apela, y hopi hende no sa nan derecho, pero si no apela den dos luna e balor lo por bira determinante, no pa awor pero pa tur aña venidero y pa cinco aña minimo”, mr. Bikker a remarca.

Den concepto di PDR esaki no ta corecto y gobierno mester coregi esey.

Diamars mainta e fraccion di PDR a entrega un serie di pregunta na e minister di finanzanan, pasobra:

a)  Sin bay parlamento no por, indirectamente, na un manera scondi kita e parti di 60 mil florin cu no ta paga belasting riba dje. “Nos ta haya cu e beslagvrije voet ta di antaño, pasobra awendia ni un caminda por haya un cas di 60 mil florin pa cumpra”.

E ora ey mester bay adapta el beslagvrije voet semper den e pensamento di e Legislador, cu e ciudadano humilde no mester paga belasting riba un cas di pueblo. “Nos ta pensa cu e 60 mil florin ey mester wordo ubrica y adapta na e balornan di casnan humilde di awendia.

b) Gobierno mester revisa “across the board” tur e balornan desproporcional cu nan a pone awor aki na 2016 riba propiedad “anto pa colmo gobierno no ta duna di conoce for di unda nan a saca e balornan ey, pasobra un gobierno responsable lo mester por bin cu rapportnan di taxacion di nan mes, of cu nan laga haci, cu ta bisa cu den nan concepto tal cas tin tal balor. Pero no, nan ta yena un cifra cu nan ta kere bo cas ta bal, y si den luna bo no ta bin apela, esey ta keda skirbi riba piedra”, mr. Bikker a indica.

Parlamentario mr. Bikker a reitera cu esaki, indirectamente, ta un medida riba pueblo sin consulta Parlamento ni haci un taxacion. El a expresa cu PDR sa cu e cash flow di gobierno ta hopi preta, pero esaki no ta manera di cada bes bin bisti pueblo cu medida.

El a invita personanan cu a haya un cobranza barbaro di Grondbelasting pa 2016 acerca Fundacion Pro Husticia riba tur Diahuebs (na Boegoeroei) 57-b fe 4:00pm y  lo bo wordu yuda cu un carta di apelacion gratuitamente, pasobra esaki ta un inhusticia!

Expresionnan haci den e articulo aki no necesariamente ta refleha opinion di ArenaPoliti.co