Relaciona cu e desicion di Ministerio Publico pa pidi 3 aña y mey pa un abusador sexual cu a wordo gara sunu den auto cu un mucha menor di edad, e lider di MEP a haya bon pa ataca partido AVP riba esaki enbez di yuda busca un solucion real pa e dolor aki! 

E ta un BERGUENSA cu e lider di oposicion no ta usa su conocemento di ley pa papia berdad den e asunto aki. Ta un BERGUENSA cu e lider di oposicion ta purba pone e culpa na e luga robez y sconde e echo cu e ta papia so sin actua! E ta un BERGUENSA y un comportacion irresponsabel pa un hende cu sa miho, ta actua asina insincero. Ni pa bentaha politico un "lider politico" ta bruha tera di e forma aki. Esta un BERGUENSA! 

ECHONAN 
E echonan ta contradeci atrobe completamente loke e lider di MEP ta bolbe haci. E echonan ta cu ta cu sosten di AVP den Parlamento cu a hisa e castigo pa crimennan di abuso sexual contra menos di edad na 8 aña. Den caso cu tin circunstancianan cu ta pisa mas, e castigo por bay hasta te 16 aña. Den e caso specifico cu ta den discucion awor aki, tin tur preuba cu por tin mester. E violador a wordo gara na momento di e acto. Contrario cu den otro casonan, den e caso aki no tin falta di preuba. E circunstancianan pa aumenta e castigo ariba 8 aña tambe tey. Pesey ta straña nos di AVP cu Ministerio Publico a pidi asina poco pa e castigo. Ministerio Publico a pidi menos cu mitar di e castigo cu por a wordo duna, anto sin conta e motibonan pa aumenta e castigo pa 16 aña!

Echo ta cu AVP Parlamento a haci e trabou di aumenta e castigo hopi mas halto cu loke Corte sa duna! Echo ta cu AVP ta di acuerdo cu e sentimiento di husticia di Pueblo den e casonan aki pa pidi pa e castigonan hopi mas halto. E daño cu ta causa na e victimanan ta keda cu nan pa resto di nan bida. E violado ta sali liber den un par di aña. Echo ta cu Ministerio Publico y Corte ta sigui tuma desicionnan cu ta hopi diferente cu loke e "sentimiento di husticia" den comunidad ta demanda. Echo ta cu e mes un situacion aki tin na Hulanda. Eynan tambe comunidad ta cuestiona e desicionnan di Ministerio Publico y Corte. Kier men cu esaki no ta un asunto netamente Arubiano! Echo ta cu e lider di MEP sa tur esaki. Pero apesar di sa cu e problema no ta serca Parlamento of Gobierno, pero serca Ministerio Publico y Corte, tog e lider di MEP ta scohe concientemente pa bruha tera y crea un impresion totalmente robez. E ta haci esey pa purba saca probecho politico for di un asunto asina delicado y doloroso. Esey ta un BERGUENSA!


PUNTO DI BISTA DI AVP
Fraccion di AVP den Parlamento for di aña 2010 a scucha famia di victimanan, a scucha organisacionnan cu ta boga pa husticia y pa proteccion di muchanan. Fraccion di AVP a cambia e ley y a aumenta e castigonan. Fraccion di AVP ta desaproba atrobe e echo cu Ministerio Publico y Corte di Husticia ta interpreta ley y e echonan den casonan di abuso sexual di tal forma, cu semper e castigonan ta hopi mas abou cu loke ley ta permiti of cu loke pueblo ta spera di nan como acto di husticia. AVP y Pueblo no ta pidi pa vengansa! Nos ta pidi pa husticia! Nos ta pidi Ministerio Publico y Corte pa sikiera splica nos y pueblo con nan ta yega na pidi y duna castigonan asina ley di loke ley ta permiti. Nos ta pidi pa Ministerio Publico y Corte splica nos y Pueblo ta dicon e castigonan cu ta pidi y duna ta asina leu di loke nos sentido di husticia ta spera.

Na e lider di MEP, cu ni sikiera a presenta e concepto di ley cu ela priminti pa trata den Parlamento pero awe atrobe ta purba crea un impresion totalmente robez. E no kier contribui na un solucion. E djis kier saca probecho politico! Hasta den algo asina sensitivo. Esta un BERGUENSA!

Expresionnan haci den e articulo aki no necesariamente ta refleha opinion di ArenaPoliti.co