Mas y mas ta visto cu autoridad arubano encabeza pa ministro di justicia mr. drs Arthur Dowers ta perdiendo e lucha contra criminalidad. Criminalnan ta dominando anto den tur districto di pais Aruba. Nos sociedad ta bibando den un enseguridad serio y profundo !!

E crisis financiero combina cu e cantidad di hende sin trabow…….e cantidad di hende illegal riba nos Isla y e crisis social enorme cu Aruba ta biba den ta duna un ‘prijs’ halto cu pueblo lamentablemente mester paga. Ningun ser humano ningun famia no ta sintiele segur mas bao di maneho di e actual gobierno encabeza pa Min Pres Mike Eman. 

E gobierno tin mas atencion pa crea e pretencion cu nan ta ejecuta projecto tras di projecto pero e realidad ta cu den ejecucion di hopi di e projectonan aki  parce tin un hala di person indocumenta/illegal ta trahado y e arubiano mes ta sinta na cas sin trabao. 

Un maneho di falta di atencion pa nos hobennan tambe ta dunando su fruta amarga ….unda un hala di hoben cu y sin educacion ta scoge pa participa den crimenan danjando nan bon nomber y nomber di nan famia pasobra simpelmente no tin suficiente desaroyo pa hobennan por pasa nan tempo den un forma positivo. 

Mientras  criminalnan ta dominando nos sociedad autoridad ta sinta por nada como sifuera nan a perde gara di locual ta tumando lugar y e dolor di mas grandi ta cu nan no kier baha pa kaba tampoco.

Ministro di Justicia Arthur Dowers parce di lo bai den historia como e ministro di Justicia mas ‘zwak’ cu Aruba a conoce. Nos ta deriva esaki for di propio declaracionan di sr. Ministro Dowers unda esaki a declara cu p.e.  prison cu ta cai bao di su responsabilidad  no ta ricibi suficiente fondo cu consecuencia cu  autoridad europeo lo por declara cu Aruba no ta respeta  derecho humano den e instituro di prision (K.I.A.)

PPA ta deriva esaki ademas for di declaracionan di ministro Dowers ora esaki a kaba di declara cu e ta spera cu ministerio di Justicia ricibi un 10 million florin mas e  presupuesto aki pa diferente departamento cu ta cai bao di djele. E momento cu un ministro tin cu bai den publicidad pa pone pression ta nifica cu internamente den gabinete  el a perde e bataya. Su  slogan di campanja ‘mas duro cu Dowers ta resultando  mas zwak cu Dowers’/

Na mes momento cu ministro Dowers ta hasi e declaracionan aki  ……crimen na Aruba ta tumando lugar como sifuera cu e criminalnan ta manda y autoridad ta scondiendo nan mes.  Pa colmo  Mando di polis bao di Ministro Dowers a kaba di manda informacion pa cuerpo di polis cu nan ‘overtime’ lo baha un otro 20 % e periodo aki.  Awor  pueblo…..realidad ta cu nos falta polis pa hasi e trabao…..realidad ta cu bo mester larga e polisnan cu pueblo tin …..traha overtime pa asina  cierto parti di trabao e.o. e lucha contra criminalidad  por tuma lugar debidamente.

Otro aspecto cu PPA a tuma bon nota di djele ta algun tempo pasa Ministro Dowers a duna un declaracion splicando cu bao di MEP e entrada di  ‘boetnan’ di polis riba pueblo tabata duna un entrada di  1 miljon florin y bao di su persona esaki lo ta direccion pa 3 miljon florin !!  Kiko esaki ta duna di conoce…..cu en vez cu e maneho di Ministro Dowers ta pa Cuerpo di Polis proteha e pueblo contra criminalidad …..esaki a bira cu Cuerpo di Polis lo mester  baha riba e pueblo…….parti  Boet pa loco….n’import cu nos tin un pueblo di cual un 50 % di djele tin un entrada di un salario minimo, pensioen, onderstand etc…..y  un ‘boet’ di f. 200,---  ta 10 % of mas di nan entrada. Poniendo mas pression riba pueblo cu ja kaba tin di biba bao di un regimen di  medida di e actual gobierno.

Concluyendo  maneho di Ministro Arthur Dowers parce di ta e maneho  mas zwak cu pueblo di Aruba a conoce !! Y maneho di Ministro Arthur Dowers parce di ta un maneho  na unda criminalnan ta dominando nos sociedad, pueblo ta biba ensigur y  ministro Arthur Dowers cu a bin na mando bao di e lema ‘ Duro cu Dowers’ awor  pueblo ta realisa cu a bira ‘ Dowers  esun mas zwak den historia’ y esaki lamentablemente.

E aere politico den nos sociedad ta hole necesidad di un cambio di nos  actual gobierno di Aruba, un cambio di e parlamento sumamente  zwak. E necesidad pa nos sociedad realista cu un cambio dramatico ta necesario y cu e escogencia di pueblo lo mester ta pa un gobierno di coalicion….unda  mas partido ta hasi control riba otro un realidad….!!

Cu e parlamento lo por  a bai cu ‘reces’ largando un lista di asunto ‘interes di pueblo’ cu necesidad di worde atende ta demonstra esaki na forma cla !!

Aruba, 20 di juli 2016                                 Lider Politico di PPA

                                                                      BENNY NISBET

Expresionnan haci den e articulo aki no necesariamente ta refleha opinion di ArenaPoliti.co