Un analysis di e critica y articulonan di miembronan di parlamento di MEP, di fanaticonan di MEP, hasta di ex-gobernantenan y ex-exponentenan di MEP cu a ocupa funcionnan halto den gobierno, ta mustra cu nan tin un liña di pensamento den nan articulo y expresionnan. Nan meta ta semper pa ataca e oponente personalmente sin duna un propio punto di bista, un analysis cu ta base di nan critica of un miho solucion pa un of otro problema. Rene Herde': "Nan meta no ta parse di ta pa informa pueblo di nada. Nan meta ta parse di ta pa pinta un hende malo. No loke e ta bisa, ni su punto di bista. Pero e mes. Anto nan ta haci'e cu cualkier mentira cu nan por inventa. Nan no ta sinti e necesidad pa splica of pa duna algo di preuba di nan critica of acusacion. Nan ta sinti nan mes asina orguyoso y para riba tur otro hende, cu nan no ta sinti e necesidad pa splica of hustifica nada. Loke nan bisa ta asina e ta. Punto! Esaki ta netamente e forma cu semper MEP a goberna. Ta pesey nan ta haya "Dialogo Social" perdemento di tempo y un estorbo pa gobernacion. MEP no ta importa loke ley ta bisa, pesey e raport di WODC ta menciona cu MEP a viola di ley cu ta prescribi con por usa placa di pueblo mas cu 250 biaha den algun aña. MEP no ta haya cu ta importante pa goberna den forma transparente, pesey nan a sconde mas cu 200 raport di Departamento di Acountant y a firma contract tras di lomba di colega minister. Pesey no ta nada straño cu MEP ta sigui pensa y traha den e mes un forma cu nan majornan a maneha nos pais y nan partido. E nomber di "friends and family" ta uno mereci cu Pueblo mes a duna MEP: pa famia y amigo tur cos tabata posibel. Pa Pueblo nada! Ora di aplica reglanan pa miembronan di MEP e midi ta hancho, pa Pueblo e ta smal. Ora lidernan tin casi tur nan famianan ta traha den gobierno y Pueblo ta wordo corri manera a haci cu studiantenan y trahadornan cu a bay protesta, anto ya bo sa con MEP ta pensa y actua. Mas tristo ta cu e lidernan di MEP di awe ta pensa y actua mescos: e caranan a cambia, e politica negativo a keda mescos!

Expresionnan haci den e articulo aki no necesariamente ta refleha opinion di ArenaPoliti.co