Mester sigura calidad, transparencia y posibilidad di reclamo. 

Miembro di e fraccion di AVP sr. Marlon Sneek a presenta e plan pa trece cambio den e ley cu ta regla informacion di productonan di come y en especial e fecha di vencemento di un producto. Esaki ta pa proteha consumidornan. Cu mas informacion y cu fecha di vencemento di tur producto di consumo bon cla riba e producto, esun cu ta cumpra e producto sa miho kico e ta cumpra y si e producto no ta daña of ta bay daña lihe. E cambio di ley aki ta necesario, pasobra den tiendanan tin mucho hopi producto cu ta daña despues di un tempo defini, pero riba e paki di e producto no tin fecha di vencemento. E producto no a bin cu un fecha di vencemento of esaki a wordo kita pa e consumido no por controla e producto. E cambio di ley aki ta necesario pa proteha e consumido.
Segun Rene Herde', fraccion di AVP ta haya cu mester atende e problema serio aki y di hopi otro situacion den cua e consumidor mester mas proteccion di ley. Sea ta proteccion contra tarifanan inhusto di banconan, e imposibilidad di por reclama un producto daña of ta daño scondi den un producto cu ta despues numa e consumido ta bin haya sa didje. Rene Herde': "Tin situacionnan incomprendibel y inacceptabel pa consumidornan cu nos no por sigui tolera. Por ehempel cu un tienda ta bisa un cliente cu un 'bon di regaldo' (cadeau bon) a vence ora ela bay cumpra algo cu e bon di regaldo cu e a haya pa su hacimento di aña. Riba e bon no tin nada scirbi di vencemento. Anto e tienda no ta duna niun posibilidad di reclamo of restitucion pa algo simpel asina." 

PROTECCION INTEGRAL
Fraccion di AVP ta haya cu e consumidor mester haya mas proteccion. E Codico Civil nobo cu tur su cambionan ainda no ta duna e consumido suficiente proteccion contra situacionnan inhusto cu tin ainda na Aruba. Rene Herde': "Aña pasa ora nos tabata tin e discucion riba tarifanan cu banconan comercial ta cobra nan clientenan, e tema aki a wordo discuti tambe. Expertonan a bisa cu no ta serca banconan so bo tin situacionnan asina. E miho forma segun nos y e expertonan hurido ta pa mehora e proteccion di consumidornan den un forma integral. Loke tin den Codico Civil ta fragmenta y incompleto. Pesey fraccion di AVP ta studiando e posibilidad di un asercamento mas integral. Un ley cu ta sigura por lo menos tres cos essencial pa e consumido. Esta cu e consumidor ta haya tur informacion relevante di un producto of servicio prome cu e cumpr'e. Transparencia completo ta e exigencia aki. Didos, cu consumido tin e posibilidad pa den un tempo rasonabel y bou condicionnan rasonabel, debolbe e producto y haya su placa restitui. Por ehempel den caso di informacion incompleto of fayonan scondi. Ditres, cu e consumidor tin e posibilidad di reclamo y proteccion pa ley pa un producto of servicio cu no ta loke ela cumpra. Esaki ta den casonan cu un producto no por wordo debolbi of ya a wordo usa. Den caso di un servicio por ehempel."  Banda di esaki fraccion di AVP ta haya cu e proteccion di consumido por ta hopi miho ora e consumido tin un luga bon conoci pa entrega su keho y demanda. E caminda via abogadonan ta mucho largo y mucho caro. Rene Herde': "Nos ta kere cu e proteccion den ley mester ensera e obligacion pa duna tur informacion incluso fecha di vencemento, transparencia completo riba e producto of servicio mes cu e consumido ta cumpra, garantia pa loke ela cumpra y e posibilidad pa reclamo y restitucion. Esey nos kier logra pa tur consumido y den tur situacion cu e cumpra un producto of servicio."

Expresionnan haci den e articulo aki no necesariamente ta refleha opinion di ArenaPoliti.co