ORANJESTAD – Parlamento a cuminsa trata e ley cu cambionan den Codigo Civil, cu ta wordo yama AANVULLING BW. Un ley a yega parlamento na 2014, pero cu a wordo traha riba dje desde 2010. Lider di MEP Evelyn Wever-Croes a elogia e comision cu a traha riba e cambionan cu a hasi un trabou hopi extenso, y ta di elogia. Sinembargo e forma con kier pasa nan den parlamento ta hopi pura, y no ta responsabel. Especialmente pasobra pueblo no ta na altura di kiko e cambionan ta. 
Tambe lider di MEP a remarca cu ta stranjo cu e ley aki ta wordo forsa di e forma aki, siendo cu tin otro prioridad, por ehempel e ley pa introdusi cartigonan mas severo pa abusador sexualnan di mucha tin mas prioridad cu un ley pa cambia fam di mucha.
Lider di MEP a elabora riba tres di e cambionan.

Cambio di fam di yiu
Awor ley ta asina cu e yiu ta haya e fam di tata. Den e ley nobo ta laga e posibilidad di  escohencia entre e fam di mama of di tata. Esey ta pa elimina discriminacion contra hende muher. Tambe ta introdusi e combinacion di fam di mama y tata of tata y mama. Pero e cambio di ley ta bai mas leew: ta habri e posibilidad pa plak e fam di e abuelanan tambe aserca. Esaki ta poco exagera. Pa esaki no tin ningun necesidad den nos comunidad. Nos a pidi gobierno reconsidera

Tata por deshereda su yiunan completamente.
Awor bo no por deshereda bo yuinan, nan mester haya maske ta un parti. Pero cu e cambio bo por deshereda un yiu. Berdad tin algun yiu cu no ta cuida nan mayornan, pero esey no ta regla, esey ta excepcion. Mester castigsa tur yiu pasobra tin algun sinberguensa?

Vuido of vuida ta hereda tur cos
Awor segun ley cada heredero ta haya un parti di e herencia, pues vuida, y yiunan por igual. Si kier laga tur cos pa e viuda te ora e fayese, por regla esey den un langstlevende testament. Den e cambio di ley den cierto casonan, e vuida ta hereda tur cos, y e yiunan ta haya nan parti te despues cu e viuda fayese. E cambio aki ta comprendible pa proteccion di esposonan, pero ta importante pa informa pueblo.

“Mi a hasi pregunta riba mas topico cu ta wordo cambia, y cu pueblo no ta informa di dje. Minister lo contesta esakinan otro siman dialuna, ora reunion continua”, segun Evelyn Wever-Croes, lider di MEP.

Expresionnan haci den e articulo aki no necesariamente ta refleha opinion di ArenaPoliti.co