Prome Minister Mike Eman: “Sentido di gradicimento pa tur loke nos ta y nos tin ta permiti felicidad sigui prospera”
Prome Minister Mike Eman na apertura di Happiness 360 Conference.
ORANJESTAD – Durante su palabranan di bon bini na e evento, Minister President a expresa di ta hustamente hopi contento di mira con “nos a bini hunto pa reconoce cu den e calidad di nos bida tin diferente elemento cu ta determina loke en berdad ta haci nos contento. Pa hopi den e sociedad moderno, tin demasiado enfoke riba rikesa material, su expansion y e ambicion pa crece den entrada. Den e desaroyo ey, nos a perde bista di loke en berdad ta haci nos contento.”
Como antesala pa e Dia Mundial di Turismo, Aruba ta anfitrion di e Happiness 360 Conference World Tourism Aruba, cu ta un simposio internacional den cooperacion cu e World Tourism Organization (WTO) caminda ta resalta e tendencianan den e industria di turismo, e sinergianan entre turismo, cultura y e tema cada bes mas studia y relevante di felicidad.
Prome MInister Mike Eman a relata na e sala un experiencia personal cu for di un edad hoben a demostra y laga marca den dje e sentido di convivencia y amor pa prohimo; y cu consecuentemente a contribui na su felicidad. El a comparti cu e sala e storia di con comunidad a sa di yuda su mama y rumannan, tempo cu su tata a fayece.
Esaki, banda di e investigacionnan reciente riba e importancia di un comunidad sano pa medio di bienestar general, ademas di desaroyo economico, a combence Premier Eman den tuma e posicion cu a tuma na 2009 na cara di e crisis global. Na luga di tuma restriccionnan, a fomenta inversion y actividad economico, ademas di brinda na e ciudadano mas hermentnan pa hisa nan calidad di bida.
“Nos a demostra na mundo cu esaki por y ta funciona,” Minister President Eman a bisa. “Nos a demostra cu mey mey di un crisis, bo ta apoya esnan den mas necesidad.” Awendia nos economia ta creciendo, nos deficit a baha y nos tin un di e indicenan di felicidad di mas halto na mundo.”
Ora di tuma su turno na palabra, e Secretario General di United Nations World Tourism Organization, sr. Taleb Rifai a cuminsa na expresa su gratitud sincero pa e trato estupendo cu el a ricibi for di Premier Eman y otro representantenan local. E oficial halto di Nacionnan Uni a comenta cu e ta encanta cu Aruba y su hendenan bisando na Minister President: “Bo tin un bon pueblo aki. Mi ta bay conta tur hende di dje. Mi ta bay ta bo di miho Embahador.”
E Happiness 360 World Tourism Conference ta tumando luga na Aruba dianan 13 y 14 di september na Renaissance Convention Center. E evento ta conta cu participacion varios orador renombra, ademas di un cantidad grandi di stakeholder di e industria turistico local, y tambe di varios pais.
Expresionnan haci den e articulo aki no necesariamente ta refleha opinion di ArenaPoliti.co