Pero e mester bai den PREVENCION, no den coregi loke a bai fout! 

STA CRUZ – Aruba a bira un pais masha insigur. Esaki no ta e Aruba cu nos conose mas. E problemanan cu Aruba ta enfrentando ta hopi serio, sinembargo e solucion no ta asina dificil.
Locual bo mester tin ta VISION con pa hasi Aruba sigur bek, DETERMINACION pa tuma e decisionnan cu mester wordo tuma, y CURASHI pa atende cu criminalidad cu man duro.

Den Parlamento minister Dowers a laga sa cu desde November 2015 caba el’a pidi Ministerraad 10 miyon florin extra pa combati criminalidad, pero e no a haya oido di prome minister Mike Eman. No solamente e ta mustra aki cu Mike Eman no tin ningun interes den seguridad den nos pais. Pero tambe ta mustra e prioridadnan equiboca den gobernacion. Pasobra minister Otmar Oduber ta sinta riba reserva di mas di 100 miyon florin cu tabata antes placa di belasting, pero e no kier duna Dowers placa! Mientras tanto nos cuidadanonan ta wordo asesina.

Si minister Dowers mester 10 miyon florin, of 50 miyon florin, Parlamento mester pone e fondonan ey disponible pa combati criminalidad. Pero no pa e coregi loke a pasa caba. E mester inverti e placa ey den preveni mas criminalidad. Inverti den nos sistema di ensenjansa, den nos sisteman di asistencia den problemanan social, den nos sistema coreccional, den Cuerpo Policial pa mas polis riba caya.

Nos fraccion a hasi tur lo posibel pa e reunion wordo yama den Parlamento, pero e fraccion di AVP no kier a permiti esey. Fraccion di AVP tabata kier un otro reunion pa haya mas informacion. Y na fin di e reunion, despues di scucha e minister papia pa dos ora largo sin bisa nada nobo, tur hende a bai cas, y nada a cambia. Tur cos ta sigi mesun cos. Nos no por sigi hasi e mesun cosnan y spera resultado diferente!

Nos a bisa caba, e tempo pa sinta papia a pasa, esaki ta tempo pa tuma accion. Tur hende kier biba trankil bek. Ami, Evelyn Wever-Croes ta para pa esey. Pueblo kier pa su representantenan den gobierno y den parlamento percura pa esey. Ami kier pa e trankilidad bin bek na Aruba, y mi lo sigi insisti den e reunion aki pa nos cuminsa actua realmente.

Expresionnan haci den e articulo aki no necesariamente ta refleha opinion di ArenaPoliti.co