ORANJESTAD – Minister President Mike Eman a keda masha complaci di a tende e resultadonan di e estudio riba Felicidad na Aruba. No solamente pa wak e estadisticanan cu ta mustra cu 51% di e poblacion ta sinti cu nan ta miho para compara cu cinco aña prome, pero tambe pa tuma nota di e puntonan cu mester sigui traha riba dje pa continua riba e direccion positivo aki.

Premier Eman a tende con e catedratico Arubiano dr. Robertico Croes a trece ponencianan dilanti, por ehempel, di con espacionan di recreacion manera Linear Park ta haci un diferencia grandi den e calidad di bida di personanan y cu pueblo ta desea di mira mas asina. 

Despues cu dr. Croes a presenta e resultadonan di su estudio haci e aña aki riba ‘Index di Felicidad’ na Aruba, a sigui un discusion di panel den cual tabata programa pa participa e propio Croes como director di Dick Pope Sr. Institute for Tourism Studies na Universidad di Central Florida hunto cu Minister di Turismo, Transporte, Sector Primario y Cultura Otmar Oduber. E ultimo aki a invita Secretario General di  United Nations World Tourism Organization, sr. Taleb Rifai y Prome Minister Mike Eman pa forma parti di e panel.

Durante e sesion aki, cada panelista a trece dilanti nan impresion riba e papel cu felicidad ta hunga den e bida diario di e Arubiano; y den Aruba como destino y producto turistico. Prome Minister ta tuma e resultadonan di e estudio como un fuente di motivacion y inspiracion pa sigui traha riba e desaroyo integral di nos comunidad; tanto economico como bienestar general. Di su banda, Secretario General Rifai a elogia Premier Eman y Minister Oduber pa e experiencia y impresionnan cu ta e ta bay cu ne di Aruba y, en special, di su hendenan. 

Como antesala pa Dia Mundial di Turismo, Aruba tabata anfitrion di e Happiness 360 Conference World Tourism Aruba. E simposio internacional, realisa den cooperacion cu e World Tourism Organization, a resalta e tendencianan den e industria di turismo, e sinergianan entre turismo, cultura y e tema cada bes mas studia y relevante di felicidad. E siman aki varios orador renombra, ademas di un cantidad grandi di stakeholder di e industria turistico local y di varios pais a reuni durante dos dia.

Expresionnan haci den e articulo aki no necesariamente ta refleha opinion di ArenaPoliti.co