Nos por a lesa y scucha diferente parlamentario cuminsa bende pueblo, cu despues cu nan a ‘studia’ e ‘CITGO-deal’ bou vigilancia, cu e no ta algo malo pa pueblo. Pasobra e lo bay crea algun cupo di trabou pa cierto comerciante local, cu por suministra algun servicio na e ‘mehorador’. Pues e campaña di manipulacion a cuminsa, pa no bisa pueblo cu parlamento atrobe no a haci su trabou debidamente. Remarcabel tabata pa scucha miembronan di oposicion, tratando di bende pueblo cu e ‘CITGO-deal’ biyonario, como algo bon. Tur esaki pa cubri nan incapacidad y pa asina haya asina un pida di e cabay di campaña ‘mehorador’? Pregunta publico na gobierno y parlamento: Si e ‘CITGO-deal’ tabata asina bon, anto dicon e gobierno di Corsou no kier renoba e contract cu PDVSA?

Desde aña pasa, partido ABO tabata mustra cu e ‘CITGO-deal’ no ta den beneficio di Aruba, su medio ambiente y su futuro generacionnan. Pero asina mes, nos parlamentarionan a scoge pa felicita gobierno 13 mei 2016 pa algo sin un dia nan a mira un solo documento. Algo hopi straño, mirando cu tur dia oposicion ta bisa pueblo cu gobierno no ta di confia. E ta bira mas straño ora agrega cu esaki ta e gobierno cu semper a entrega presupuestonan ficticio, cu a redobla e debe den apenas 3 aña y cu a entrega e autonomia financiero di Aruba riba 27 augustus 2015, parlamento a laga ‘wheel and deal’, sin aprobacion y sin control.

Mientrastanto e ‘CITGO-deal’ ta un ‘done deal’ y a resta parlamento atrobe pa solamente ‘teken bij het kruisje’, pa asina legalisa un otro proyecto cuestionabel cu lo redobla e debe existente y formalisa e entrega di Aruba na otro nacionalidadnan ainda mas.

Den e  ‘Definitive Participation Agreement (Execution version), pues e ‘CITGO-deal’, tin acorda den seccion 16.4: ‘..acknowledges and agrees that until RDA is formed and registered at the Chamber of Commerce of Aruba and has ratified any and all legal acts performed by the Government on behalf of RDA i.o., the Government shall for all purposes be legally liable for all legal acts entered on behalf of RDA i.o…’

Pues sin cu gobierno a puntra of a haya aprobacion di parlamento, ya gobierno a mara RDA (Refineria di Aruba) na obligacionnan biyonario, cu pueblo ta para garantia pa esakinan.

Tambe den seccion 21.3, por lesa: ‘The Parties acknowledge that certain provisions relating to the lenders providing financing for CAR and its Affiliates investment in the Refinery and the Aruba Project or otherwise in connection with such financing are contained in the Definitive Participation Agreement, including provisions requiring the Government to cause RDA to take or refrain from taking certain actions and to enter into certain agreements, AND NOTHING IN THIS AGREEMENT SHALL AFFECT SUCH PROVISIONS’

Y den seccion 22.2: ‘Simultaneously with the execution of this Agreement, the Parties have executed the Umbrella Dispute Settlement Agreement. The Parties agree that any Dispute.., WHETHER OR NOT THIS AGREEMENT HAS BEEN TERMINATED, SHALL BE REFERRED FOR SETTLEMENT AND FINALLY SETTLED..ALL IN ACCORDANCE WITH THE PROVISIONS OF THE UMBRELLA DISPUTE SETTLEMENT AGREEMENT’.

Pues a pesar cu segun e ‘CITGO-deal’, e ley Arubiano lo ta esun vigente, gobierno a firma un ‘Umbrella Dispute Settlement Agreement’ unda tur asunto legal a wordo regla caba y cu esaki lo sirbi como e base legal pa cualkier disputa. Pregunta publico na gobierno y parlamento: Kico a wordo palabra den e ‘Umbrella Dispute Settlement Agreement’ y dicon mester tin un ‘Umbrella Dispute Settlement Agreement’ si no tin nada di sconde?

Lesando solamente e seccionnan aki di e ‘CITGO-deal’, tur hende por mira, hasta Jose Feliciano y Stevie Wonder, cu gobierno a hinca pueblo den un otro aventura biyonario cu bendicion di parlamento. Pues e debate riba e ‘CITGO-deal’ lo ta un otro show politico pa gaña pueblo manera semper, cu tur ta ‘lucha pa salba’ Aruba su economia cu nan mes a destrui.

Un ex-prome ministro di Aruba a yega di bisa ‘cu den e wega di ‘ajedrez’ no tin burico’. Tambe nos conoce e figura di ‘changa’ den e wega di domino. Wel den e caso di e ‘CITGO-deal’ gobierno a ‘changa’ parlamento hungando su wega di ‘ajedrez’. P’esey pueblo por anticipa di antemano e resultado di e votacion di e debate pa legalisa e ‘CITGO-deal’ controversial y anti-pueblo: Tur  miembro di parlamento lo vota ‘VOOR’ y e manipulacion di pueblo por cuminsa. Mas sincero, lo ta si parlamento admiti cu gobierno a ‘changa’ parlamento cu e ‘CITGO-deal’, pasobra e tabata morto na soño, enbes di trata di gaña pueblo, hunto cu gobierno, cu e ‘CITGO-deal’ ta algo bon, pasobra e lo genera 10 miyon dollar (18 miyon florin) anual pa suavisa e debe biyonario!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co