Partido Democracia Real ta hopi preocupa pa motibo di e falta di vision di gobierno riba e crecemento economico di nos pais. 

Segun Andin Bikker lider di PDR e ta basa su mes den e rapport di Banco Central cu mester a ahusta e prognosis cu a bay di 1.4 proyeccion y nan a bahe te na 0.4 y ni na apertura di e refeneria no ta trese cambio di projeccion di Banco Central , cual instituto ta bisa cu lo no tin cambio den e prognosis aki.

Banco Central ta laga sa como un di e motibonan cu turismo na Aruba ta bahando hopi y pareu cu esaki e poder di compra di nos ciudadanonan.

Aki Bikker a bisa cu ja caba nos ciudadanonan ta bao di bestand minimo. Minimum loon ta 1700 florin laba laba y e bestand minimum pa un persona su so ta 2600.

Bikker ta puntra con un hende cu un entrada di sueldo minimo por paga su debenan y biba dignamente.

E lider di PDR a splica cu e crecemento economico ta nifica cu gobierno ta haya suficiente entrada for di fuente directo y indirecto y sin nodi mishi cu medida (subi impuesto) por inverti den trahamento di scolnan, y otro beneficionan pa pueblo.

Si no tin e crecemento ey gobierno tin cu mira wak con ta haya entrada y baha gasto, y sea e tin cu fia placa of introduci medida cu ningun hende ni ningun pueblo ta wardando riba nan.

Un bez mas e ta cuestiona un gobierno cu durante 8 aña di gobernacion no a genera ni un pilar economico nobo pa por a crea un berdadero crecemento economico.

E parlamentario ta conduci cu Banco Central cu gobierno ta pone pronosticonan hopi optimista pero irealistico. Hasta el a bisa cu na 2015 tabata tin cero crecemento economico pa nos pais. E aña aki no a haci mucho tampoco y 2014 a keda den 0.4% so.

Esaki ta pone Aruba den desbentaha compara cu otro paisnan manera Panama cu ta e lider di crecemento economico di 6 pa 7% y Colombia cu 5.4. E lider di PDR ta califica nos gobierno cu un zeer onvoeldoende pero asina mes e no por keda sinta, e tin cu baha bay cas.

PDR constantemente ta keda papia di nos economia, ta bay papia cu autoridadnan conceriente, y Andin Bikker liderando PDR ja caba tin un plan di accion pa bay urnanan cune pa stimula economia di internet y otro visionnan pa haci di Aruba seriamente, un hub den Caribe.

Gobierno ta papia hopi di hub pero no a pasa ni un ley, ningun acuerdo fiscal di liber comercio sikiera cu nos hermana Isla Curacao.

No ta prome biaha cu Banco Central tin cu ahusta un prognosis di gobierno. Ja caba gobierno mester a cambia cifra si ora IMF a bishita nan y tempo cu CFT a mustra cu gobierno su pronostico ta demasiado optimista y no ta cuadra. Algo cu awor BANCO CENTRAL ta bin confirma tambe, Andin Bikker a splica.

Expresionnan haci den e articulo aki no necesariamente ta refleha opinion di ArenaPoliti.co