Den Parlamento Lider di MEP a recore e trayectoria di e lucha pa nos refiberia. E lucha a cuminsa cu e palabranan legendario y compromiso di sr Betico Croes den felis memoria na 1985 "si tin 1% oportunidad pa habri e refineria, nos lo lucha pa hasi'e 100%". Palabranan cu te awe ainda 31 anja despues, ta inspira nos. Ta danki na e lucha di MEP lidera pa sr Nelson Oduber na 1990 awe nos tin refineria pa habri. Nos tur ta corda e skernan gigantesco cu Henny Eman a pone pa corta e tubonan e tempo ey. Pero ta danki Dios pueblo a manda e gobierno ey di AVP cas, cu awe nos ta papiando di refineria.

Y mesun cos a pasa atrobe den gobernacion di AVP na 2015. Pesey ora cu na 2015 AVP a anuncia desmantelacion nos a mobilisa miles di persona dia 27 februari, un diabierna anochi pa e gate di Valero. Y eynan nos a manda e prome senjal pa Valero: Para e desmantelacion. Y esey a pone cu awe nos ta bibando den e speransa di reapertura di e refineria.
Pues: si bo kier papia di REFINERIA bo mester ta serca MEP. Danki na tur persona cu a companja nos den accion ora Cero, na gate di refineria, te marduga. Boso a marca e diferencia. Despues, a bin e inciativa pa trese sr. Nelson English, despues a bin grupo PARA. Bo ta mira cu poco poco e speransa a bolbe den nos comunidad cu Aruba por hasi algo grandi di e refineria. Un danki especial na colega Glenbert Croes cu nunca a cansa di lucha.

Ainda mi ta corda e tempo ey con fuerte nos mester a bataya den e sala aki pa conbense esnan di AVP pa no desmantela. Nos a presenta mocionnan pa para e desmantelacion pero AVP a vota contra. Na 2013, 2014 y na 2015. Pasobra hasta tabata tin coleganan den sala di Avp cu a hasi mofa y chercha di intentonan cu a wordo hasi dor di MEP y Glenbert.
** Pesey awe mi kier puntra gobierno pa den un forma explicito splica e cambio repentino di postura y motibonan! Esta kiko a pasa despues cu Valero y minister de Meza a declara cu lo cuminsa desmantela, … y e enthusiasmo cu tin awor cu reapertura di e refineria? Splica pueblo kiko tabata e punto of e momento di cambio?

Expresionnan haci den e articulo aki no necesariamente ta refleha opinion di ArenaPoliti.co