"Nos ta reuniendo awe tocante un ley sin cu nos a haya tur documento di e ley. Mi ta decepciona cu Gobierno no ta transparente y mi ta mas decepciona ainda den e postura di e Presidente di Parlamento relaciona cu e contractnan cu ta parti di e ley cu ta wordo trata den Parlamento awe.
Y laga nos no bruha un cos cu otro. Aki NO ta referi na documentonan informativo cu gobierno por pone "ter inzage" durante reunion publico.
Aki ta trata di contractnan cu ta wordo menciona den e ley, y cu e ley ta referi na dje. Wak art 3 di e ley cu ta bisa literalmente: "tot de overeenkomsten, bedoeld in de eerste volzin behoren in ieder geval: (a) een Refinery Lease Agreement met Citgo en (b) een Terminal Lease Agreement met Citgo." Den e caso aki e contractnan ta parti integral di e ley y pues gobierno mester duna Parlamento nan. Keda sin duna Parlamento documentonan y stroba Parlamentarionan di hasi nan trabou ta actonan castigabel y condenabel den un estado di derecho.
Mi ta lamenta cu e presidente di parlamento a scohe pa defende gobierno siendo cu su tarea ta pa defende parlamento.
Mientras tanto mi a ricibi e documentonan, no via gobierno sino den mi brievenbus. Y mi conclusion ta cu e documentonan no ta confidencial. Hasta tin autorisacion den e contract pa duna Parlamento nan. Bo no mester ta hurista pa compronde esey. Cu esaki AVP ta skibi e pagina mas scur di historia di nos democracia. Y e consequencianan, ta boso mester bai biba cu nan.

Mi ta lamenta tambe cu ta rush e tratamento di e ley aki, cu nos a ricibi diamars 20 september, y ya awe 26 september nos ta trate. Riba dje nos mester a traha bou supervision di coordinadornan di minister cu no ta ni huramenta. Con nan por garantisa confidencialidad e ora?

E documentonan NO ta confidencial, y hasta e companianan ta duna Gobierno autorisacion pa duna Parlamento nan! Naturalmente esaki ta laga un smak amargo atras.

Presidente di parlamento a skibi e pagina di mas scur den democracia di nos pais" sra Evelyn Wever-Croes a termina bisando.

Presidente di Parlamento no por a contesta nada.

Expresionnan haci den e articulo aki no necesariamente ta refleha opinion di ArenaPoliti.co