PDR a entrega un mocion pa sigui adelanta e logro pa haya un hyperbaric station na Hospital di Aruba.

Andin Bikker a splica den rueda di prensa cu manera ta conoci PDR tin varios aña ta trece e tematica aki dilanti pasobra ta importante no solamente pasobra Aruba ta haya hopi turista cu ta practica scuba dive, y si un persona ta bin halto mucho lihe e por haya un tipo di syndrome, cu ta pone cu e mester bay pa un tratamento di decompression y tambe pasobra pacientnan cu cierto tipo di malesa, manera herida habri pa motibo di diabetes, entre otro tipo di herida y infeccion y pacientnan di cancer tambe, ta beneficia di tratamento di e tipo di instalacionnan aki.

Pesey PDR ta keda insisti, y e fraccion a bin compronde cu AZV ta paga un average di casi un miyon florin pa aña, pa manda pacientnan na otro islanan pa haya tratamento cu un tipo di facilidad asina aki, cu tur e gastonan acerca ora cu e famia tin cu compaña e pacient, etc., y cu awor por haya un hyperbaric chamber na Aruba manera cu Hospital ta desea, cu ta clinicamente proba y pa un suma relativamente pagable. Pero Hospital tin cierto retonan pa cu e suma inicial aki. PDR a bisa gobierno cu kizas por pensa riba un garantia di parti gobierno, pasobra segun concepto di PDR e suma average cu AZV ta pagando pa aña di un tiki menos cu un miyon florin, por wordo usa en todo caso pa traha un business case caminda cu e proyecto aki ta bira enteramente financiabel. Dijs un empuhe so mester cu gobierno ta para garantia of duna un otro sorto di aporte, anto den un aña average por logra esaki. Andin ta spera cu e mocion aki sala lo vota pro ora nan bay pa votacion.

Expresionnan haci den e articulo aki no necesariamente ta refleha opinion di ArenaPoliti.co