Segun Parlamentario mr. Juan Ady Thijsen cada politico tin su estilo di hiba politica y esey ta su derecho. Colega politico Alex Schwengle y alavez colega savanetero tambe tin di dje.

Mescos cu Parlamentario Juan Ady Thijsen Alex Schwengle tambe a bin di sector priva y di e categoria di profesionalnan liber academico. Parlamentario mr. Juan Ady Thijsen ta abogado y Alex Schwengle ta dokter specialista di pulmon.

Den caso di Ady Thijsen su persona a escohe pa como politico posesiona su mes den e sapato di e cuidadano humilde cu merece cu nos pais dune’le un desaroyo di un bon calidad di bida pe y su famia.

Sinembargo e experiencia di scucha Alex Schwengle ta cu su persona a escohe pa presenta su mes cu posicion mas profesional como politico y academico. Sinembargo lew a lew Schwengle ta cay den e estilo di AVP pa baha bow nivel manera e ta expresa su mes di lider di MEP y lider di Fraccion di MEP como e "supuesto lider".

Apesar di esaki pueblo di Aruba y muy en especial pueblo di Savaneta a keda sumamente sorprendi cu Alex Schwengle a yama e bario unda e a lanta como un bario bruha.

Schwengle tabata reacionando riba un pregunta di Parlamentario mr. Juan Ady Thijsen si tin posibilidad di yuda mayornan cu a bay biba den exterior pa sostene nan yui deportista.

Akinan Schwengle a bay splica cu e bario cu e a lanta ta bruha y cu niun hende no a yuda nan. Reacion den pueblo di Savaneta tabata di hopi rabia y pa es motibo Alex Schwengle a escohe pa bay duna un declaracion den prensa.

"Mi no ta orguyoso di caya unda m’a lanta pa via di Hotel Roys".

Segun Parlamentario mr. Juan Ady Thijsen ta straño pa noord di Roys a lanta un polis, pabao di Hotel Roys y mas cerca cu Schwengle a lanta Fredis Refunjol y nunca nan a critica ni e barrio di Roys ni Savaneta.

E declaracion di Alex Schwengle ta confirma cu AVP no tin realmente Savaneta na pecho. Esaki ta mirando e hecho cu delaster tempo tin hopi cos andando den Savaneta. Pueblo di Rooi Koochi sufriendo di caminda na werki. Cas di cuidadanonan a worde tumba abao. Trafico ta mal guia cu ta ocasiona accidentenan.

Parlamentario mr. Juan Ady Thijsen(MEP) ta lamenta cu Alex Schwengle a ofende pueblo di Savaneta y ta spera cu ainda un disculpa por bin di parti di colega Schwengle. Segun Parlamentario mr. Juan Ady Thijsen(MEP) pueblo di Savaneta merece mihor y su persona y partido tin plannan grandi pa cu Savaneta una vez pueblo duna partido MEP e oportunidad pa goberna nos pais un biaha mas.

Expresionnan haci den e articulo aki no necesariamente ta refleha opinion di ArenaPoliti.co